صبح کے بارہ بجے رات کا مطلب سمجھے

صبح کے بارہ بجے رات کا مطلب سمجھے

کوئی اے کاش مری بات کا مطلب سمجھے

میرے بستر پہ پڑی ہیں مری بھیگی آنکھیں

اس سے کہہ دو کہ وہ برسات کا مطلب سمجھے

ایک شاعر ہوں یہی نام و نسب ہے میرا

پر یہاں کون مری ذات کا مطلب سمجھے

دیر سے ہم پہ کھلے وصف ترے شجرے کے

دیر سے ہم تری اوقات کا مطلب سمجھے

زیب تن ماں نے ہی کر رکھا ہے جدت کا لباس

بیٹی پھر کیسے روایات کا مطلب سمجھے

بد عمل جتنے ہیں وہ صاحب مسند ہیں یہاں

ایسے میں کون مکافات کا مطلب سمجھے

خطبہ زینب نے دیا جب سر دربار یزید

نا سمجھ تب کہیں سادات کا مطلب سمجھے

جس کا مقسوم صفا مروہ نہ کعبے کا طواف

کیسے واصفؔ وہ بھلا سات کا مطلب سمجھے

subh ke bara baje rat ka matlab samjhe

koi ai kash miri bat ka matlab samjhe

mere bistar pe pari hain miri bhigi ankhen

us se kah do ke wo barsat ka matlab samjhe

ek shayar hun yahi nam-o-nasab hai mera

par yahan kaun miri zat ka matlab samjhe

der se ham pe khule wasf tire shajare ke

der se ham tiri auqat ka matlab samjhe

zeb tan man ne hi kar rakha hai jiddat ka libas

beti phir kaise riwayat ka matlab samjhe

bad amal jitne hain wo sahab-e-masnad hain yahan

aise mein kaun mukafat ka matlab samjhe

khutba zinib ne diya jab sar-e-darbar-e-yazid

na samajh tab kahin sadat ka matlab samjhe

jis ka maqsum safa marwa na kaabe ka tawaf

kaise wasaf wo bhala sat ka matlab samjhe