جبر نے جب مجھے رسوا سر بازار کیا

جبر نے جب مجھے رسوا سر بازار کیا

صبر نے میرے مجھے صاحب دستار کیا

میری لفظوں کی عمارت گری کام آئی مرے

میری غزلوں نے مرے نام کو مینار کیا

اپنے ہاتھوں میں کدورت کی کدالیں لے کر

میرے اپنوں نے مری ذات کو مسمار کیا

یاد جب آیا کوئی وعدۂ تعمیر مجھے

میں نے تب جسم کی ہر پور کو معمار کیا

اور پھر سبز اشارہ ہوا اس پار سے جب

میں نے اک جست میں دریائے بلا پار کیا

آج پھر خاک بہت روئی لپٹ کر مجھ سے

آج پھر قبر نے بابا کی مجھے پیار کیا

چاند نے رات مرے ساتھ مرے دکھ بانٹے

صبح سورج نے بھی گریہ سر دیوار کیا

آگ اشجار کو لگنے سے کئی دن پہلے

میں نے رو رو کے پرندوں کو خبردار کیا

ایسا ماتم کبھی دریا کا نہ دیکھا نہ سنا

جانے کس پیاس نے پانی کو عزا دار کیا

جب ہوا دینے لگی ٹھنڈے دلاسے مجھ کو

کچھ چراغوں نے بھی افسوس کا اظہار کیا

دیکھ کر جلتی ہوئی جھونپڑی کل شب واصفؔ

میں نے سوئے ہوئے درویش کو بیدار کیا

jabr ne jab mujhe ruswa sar-e-bazar kiya

sabr ne mere mujhe sahab-e-dastar kiya

meri lafzon ki imarat giri kam ai mire

meri ghazlon ne mire nam ko minar kya

apne hathon mein kudurat ki kudalen le kar

mere apnon ne miri zat ko mismar kiya

yad jab aya koi waada-e-taamir mujhe

main ne tab jism ki har por ko memar kiya

aur phir sabz ishara hua us par se jab

main ne ik jast mein dariya-e-bala par kiya

aj phir khak bahut roi lipat kar mujh se

aj phir qabr ne baba ki mujhe pyar kiya

chand ne rat mire sath mire dukh bante

subh suraj ne bhi girya sar-e-diwar kiya

ag ashjar ko lagne se kai din pahle

main ne ro ro ke parindon ko khabardar kiya

aisa matam kabhi dariya ka na dekha na suna

jane kis pyas ne pani ko aza dar kiya

jab hua dene lagi thande dilase mujh ko

kuchh charaghon ne bhi afsos ka izhar kiya

dekh kar jalti hui jhonpari kal shab wasaf

main ne soe hue darwesh ko bedar kiya