جو نباتات و جمادات پہ شک کرتے ہیں

جو نباتات و جمادات پہ شک کرتے ہیں

اے خدا تیرے کمالات پہ شک کرتے ہیں

وہ جو کہتے ہیں دھماکے سے جہاں خلق ہوا

در حقیقت وہ سماوات پہ شک کرتے ہیں

میں بھی بچپن میں تفکر پہ یقیں رکھتا تھا

میرے بچے بھی روایات پہ شک کرتے ہیں

میں اسی شہر میں آنسو لیے پھرتا ہوں جہاں

پیڑ چڑیوں کی مناجات پہ شک کرتے ہیں

اپنے حصے میں وہ بے فیض صدی ہے جس میں

لوگ ولیوں کی کرامات پہ شک کرتے ہیں

اس لیے ہم پہ گزرتی ہے قیامت ہر دن

ہم قیامت کی علامات پہ شک کرتے ہیں

آپ کے کھیت میں اگتی ہے سنہری گندم

آپ کیوں اس کی عنایات پہ شک کرتے ہیں

جن کو موسیٰ کا پتا ہے نہ خبر طور کی ہے

ایسے بد بخت بھی تورات پہ شک کرتے ہیں

عشق کی عین کا تو دشت میں مدفن ہی نہیں

عاشقاں یوں ہی خرابات پہ شک کرتے ہیں

آپ جھرنوں کی تلاوت کو نہیں سن سکتے

آپ فطرت کے اشارات پہ شک کرتے ہیں

صرف شاعر ہی نہیں ہوں میں مسلمان بھی ہوں

آپ کیوں میری عبادات پہ شک کرتے ہیں

آپ کو چاہیے سقراط کے بارے میں پڑھیں

آپ واصفؔ کے خیالات پہ شک کرتے ہیں

jo nabatat-o-jamadat pe shak karte hain

ai khuda tere kamalat pe shak karte hain

wo jo kahte hain dhamake se jahan khalq hua

dar haqiqat wo samawat pe shak karte hain

main bhi bachpan mein tafakkur pe yaqin rakhta tha

mere bachche bhi riwayat pe shak karte hain

main isi shahr mein ansu liye phirta hun jahan

per chiriyon ki munajat pe shak karte hain

apne hisse mein wo be faiz sadi hai jis mein

log waliyon ki karamat pe shak karte hain

is liye ham pe guzarti hai qayamat har din

ham qayamat ki alamat pe shak karte hain

ap ke khet mein ugti hai sunahri gandum

ap kyun us ki inayat pe shak karte hain

jin ko musa ka pata hai na khabar tur ki hai

aise bad bakht bhi taurat pe shak karte hain

ishq ki ain ka to dasht mein madfan hi nahin

ashiqan yun hi kharabat pe shak karte hain

ap jharnon ki tilawat ko nahin sun sakte

ap fitrat ke isharat pe shak karte hain

sirf shayar hi nahin hun main musalman bhi hun

ap kyun meri ubbadat pe shak karte hain

ap ko chahiye suqrat ke bare mein parhen

ap wasaf ke khayalat pe shak karte hain