انہیں خبر ہے انہیں مجھ سے کام کوئی نہیں

انہیں خبر ہے انہیں مجھ سے کام کوئی نہیں

سو ان غلاموں میں میرا غلام کوئی نہیں

جو ننگ شعر ہیں ننگ ادب ہیں رسوا ہیں

خدا کا شکر مرا ان میں نام کوئی نہیں

ہر ایک شعر خدا کی عطا سے ہوتا ہے

اے میرے دوست یہاں حرف خام کوئی نہیں

کہیں سے ملتی ہے خیرات سب کو لفظوں کی

یہاں وگرنہ سخن کا امام کوئی نہیں

سبھی بدن کے پجاری سبھی ہوس کے غلام

قلم قبیلے میں سیتا کا رام کوئی نہیں

یہ لوگ کون سی شہرت کی بات کرتے ہیں

جب اس جہاں میں کسی کو دوام کوئی نہیں

وہ خود ہی کرتے ہیں اپنا مقام طے واصفؔ

جو جانتے ہیں کہ ان کا مقام کوئی نہیں

unhen khabar hai unhen mujh se kam koi nahin

so in ghulamon mein mera ghulam koi nahin

jo nang-e-sher hain nang-e-adab hain ruswa hain

khuda ka shukr mira un mein nam koi nahin

har ek sher khuda ki ata se hota hai

ai mere dost yahan harf-e-kham koi nahin

kahin se milti hai khairat sab ko lafzon ki

yahan wagarna sukhan ka imam koi nahin

sabhi badan ke pujari sabhi hawas ke ghulam

qalam qabile mein saita ka ram koi nahin

ye log kaun si shohrat ki bat karte hain

jab is jahan mein kisi ko dawam koi nahin

wo khud hi karte hain apna maqam tai wasaf

jo jante hain ke un ka maqam koi nahin