سوچ لیجے کیوں عذاب آیا تھا قوم ہود پر

سوچ لیجے کیوں عذاب آیا تھا قوم ہود پر

اور پھر کچھ غور کیجے لمحۂ موجود پر

سو طرح کی خواہشیں پیشانیوں پر درج ہیں

لگ رہا ہے ساجدوں کا قرض ہے مسجود پر

روز اول سے جہاں میں دو طرح کا ہے یقیں

ایک ابراہیمؔ پر اور دوسرا نمرود پر

سورۂ اخلاص کی تصویر ہے گر ایشور

میرا بھی ایقان ہے پھر آپ کے معبود پر

رات پھر میری خدا سے فجر تک گپ شپ ہوئی

رات پھر ہنستے رہے ہم دونوں ہست و بود پر

شام کو پھر یاد آئی شام کے بازار کی

پھر کیا میں نے تبرا شام کے مردود پر

یاد آ جاتی ہیں اب بھی کوڑا کرکٹ دیکھ کر

بھنبھناتی مکھیاں اک طفل نو مولود پر

ہو سکے تو دہر کا نقشہ اٹھا کر دیکھیے

کس قدر محدود ہیں ہم ارض لا محدود پر

تین چوتھائی صدی سے چل رہے ہیں قافلے

ہجرتی پہنچے نہیں ہیں منزل مقصود پر

صرف اتنا ہی کہوں گا میں سپہ سالار سے

آپ سگریٹ پی رہے ہیں بیٹھ کر بارود پر

باپ ہوں سو ایک ہی مصرف ہے میری زیست کا

خرچ ہونا ہے مجھے اولاد کی بہبود پر

دوستوں کی قدر واصفؔ پوچھیے اس شخص سے

وقت پڑنے پر لیا ہو قرض جس نے سود پر

soch lije kyun azab aya tha qaum-e-hod par

aur phir kuchh ghaur kije lamha-e-maujud par

sau tarah ki khwahishen peshaniyon par darj hain

lag raha hai sajidon ka qarz hai masjud par

roz-e-awwal se jahan mein do tarah ka hai yaqin

ek ibrahim par aur dusra namrud par

sura-e-ikhlas ki taswir hai gar ishwar

mera bhi iqan hai phir ap ke maabud par

rat phir meri khuda se fajr tak gap ship hui

rat phir hanste rahe ham donon hast-o-bud par

sham ko phir yad ai sham ke bazar ki

phir kiya main ne tabarra sham ke mardud par

yad a jati hain ab bhi kora kirkit dekh kar

bhimbhinati makkhiyan ik tifl-e-nau maulud par

ho sake to dahr ka naqsha utha kar dekhiye

kis qadar mahdud hain ham arz la mahdud par

tin chauthai sadi se chal rahe hain qafile

hijrati pahunche nahin hain manzil-e-maqsud par

sirf itna hi kahunga mein sipah salar se

ap sigret pi rahe hain baith kar barud par

bap hun so ek hi masraf hai meri zist ka

kharch hona hai mujhe aulad ki behbud par

doston ki qadar wasaf puchhiye us shakhs se

waqt parne par liya ho qarz jis ne sud par