دیکھنا ہو گر بنا کر کانچ کا گھر دیکھنا

دیکھنا ہو گر بنا کر کانچ کا گھر دیکھنا

کون برساتا ہے کس جانب سے پتھر دیکھنا

میری پلکوں پر اٹی ہے گرد رنج و کرب کی

درد آنکھوں میں سمایا ہے سمندر دیکھنا

اپنی خامشی بنے گی جب فسانہ اے ندیم

لوگ ہاتھوں میں لیے آئیں گے پتھر دیکھنا

میں ہی اک حیراں نہیں ہوں دم بخود ہیں سب یہاں

قوم کو لے جائیں گے کس سمت رہبر دیکھنا

آپ اپنے واسطے رکھ لیں چراغ عارضی

بس مرا شیوہ ہے ظلمت میں اتر کر دیکھنا

ہے وفاؤں پر بھروسہ رنگ لائیں گی ضرور

جاگ اٹھے گا کبھی میرا مقدر دیکھنا

ختم خون دل ہوا کیسے بھریں رنگ وفا

کیا بنا پائیں گے ہم تصویر دلبر دیکھنا

زاویہ اپنی اڑانوں کے بدلنے لگ گئے

کون دم لیتا ہے محسنؔ اب کہاں پر دیکھنا

dekhna ho gar bana kar kanch ka ghar dekhna

kaun barasita hai kis janib se patthar dekhna

meri palkon par ati hai gard ranj-o-karb ki

dard ankhon mein samaya hai samundar dekhna

apni khamushi banegi jab fasana ai nadim

log hathon mein liye aenge patthar dekhna

main hi ik hairan nahin hun dam bakhud hain sab yahan

qaum ko le jaenge kis samt rahbar dekhna

ap apne waste rakh len charagh-e-arzi

bas mira shewa hai zulmat mein utar kar dekhna

hai wafaon par bharosa rang laengi zarur

jag uthega kabhi mera muqaddar dekhna

khatm khun-e-dil hua kaise bharen rang-e-wafa

kya bana paenge ham taswir dilbar dekhna

zawiya apni uranon ke badalne lag gae

kaun dam leta hai mohsin ab kahan par dekhna