چاندی کی ناؤ سونے کی پتوار دیکھ کر

چاندی کی ناؤ سونے کی پتوار دیکھ کر

خود کو ڈبونے آ گئے منجھدار دیکھ کر

بس اک نگاہ ناز عجب کام کر گئی

جیتا ہوں ان کی آنکھوں میں اقرار دیکھ کر

اشکوں میں ڈھل کے بہہ گیا کاجل شب فراق

وہ یوں مچل گیا مرے اشعار دیکھ کر

جس کی مروتوں کا بھروسہ نہیں کوئی

بکتا ہے کون ایسا خریدار دیکھ کر

قائم ہے اس طرح مرا عزم سفر ابھی

چلتا رہا ہوں وقت کی رفتار دیکھ کر

اے پیکر طلسم تری سحر‌ کاریاں

ڈرتا ہوں تیرے حسن کا شہکار دیکھ کر

مارا ہوا ہے آج بھی محسنؔ خلوص کا

دل ہارتا ہے وہ نگہ یار دیکھ کر

chandi ki nao sone ki patwar dekh kar

khud ko dubone a gae manjhdar dekh kar

bas ik nigah-e-naz ajab kam kar gai

jita hun un ki ankhon mein iqrar dekh kar

ashkon mein dhal ke bah gaya kajal shab-e-firaq

wo yun machal gaya mire ashar dekh kar

jis ki murawwaton ka bharosa nahin koi

bikta hai kaun aisa kharidar dekh kar

qaim hai is tarah mira azm-e-safar abhi

chalta raha hun waqt ki raftar dekh kar

ai paikar-e-tilism tiri sehr kariyan

darta hun tere husn ka shahkar dekh kar

mara hua hai aj bhi mohsin khulus ka

dil harta hai wo nigah-e-yar dekh kar