دنیا کے مسائل سے ہر وقت گھرا ہونا

دنیا کے مسائل سے ہر وقت گھرا ہونا

مشکل تو بہت ہوگا دنیا کا خدا ہونا

امید کے دامن کو چھوڑا بھی نہیں جاتا

لگتا تو ہے نا ممکن وعدے کا وفا ہونا

جتنی بھی خطائیں ہیں یا رب ہیں جوانی کی

جب بس میں نہیں ہوتا اچھا کہ برا ہونا

دشرتھ کی طرح دنیا چھوڑی بھی نہیں جاتی

تکلیف تو دیتا ہے اپنوں سے جدا ہونا

بے کار بناتا ہے بے حال بناتا ہے

انسان کا اپنی ہی نظروں سے گرا ہونا

امید ہے ان کو بھی شاید مرے آنے کی

اتنا تو بتانا ہے دروازے کا وا ہونا

ہونا تو ضروری ہے ہر روز عبادت کا

اچھا بھی نہیں لگتا ہر روز گلہ ہونا

کیا ان کو سکھائے گا کیا ان کو بنائے گا

تلواروں کے سائے میں بچوں کا بڑا ہونا

یاروں کی محبت ہے تیرا بھی کرم یا رب

پروازؔ سے انساں کو ہر شے کا ملا ہونا

duniya ke masail se har waqt ghira hona

mushkil to bahut hoga duniya ka khuda hona

ummid ke daman ko chhora bhi nahin jata

lagta to hai na mumkin waade ka wafa hona

jitni bhi khataen hain ya rab hain jawani ki

jab bas mein nahin hota achchha ke bura hona

dashrath ki tarah duniya chhori bhi nahin jati

taklif to deta hai apnon se juda hona

be kar banata hai be hal banata hai

insan ka apni hi nazron se gira hona

ummid hai un ko bhi shayad mire ane ki

itna to batana hai darwaze ka wa hona

hona to zaruri hai har roz ibadat ka

achchha bhi nahin lagta har roz gila hona

kya un ko sikhaega kiya un ko banaega

talwaron ke sae mein bachchon ka bara hona

yaron ki mohabbat hai tera bhi karam ya rab

parwaz se insan ko har shai ka mila hona