اس درجہ مطمئن ہیں تری دوستی سے ہم

اس درجہ مطمئن ہیں تری دوستی سے ہم

مانگے اگر تو جان بھی دیں گے خوشی سے ہم

کہہ ڈالیے جو آپ کے دل میں ہے بے دھڑک

کرتے نہیں ہیں بات کسی کی کسی سے ہم

ہے ان کی بات اور ہے ان کا حساب اور

ویسے تو پیار کرتے ہیں ہر آدمی سے ہم

یا رب ابھی بھی ہے تری رحمت پہ اعتبار

بے شک ہیں بے حساب خفا زندگی سے ہم

اچھی لگیں سبھی کو ہماری نصیحتیں

کہتے ہیں تلخ بات بھی اس سادگی سے ہم

ہوگی تو جیت اس کی بہر حال عشق میں

کتنا کریں مقابلہ مردانگی سے ہم

رہتا نہیں مزاج ہمیشہ تو ایک سا

کب تک سہیں گے جور ترے خامشی سے ہم

پروازؔ زندگی میں جو ہونا تھا ہو چکا

کیوں جاتے جاتے توبہ کریں مے کشی سے ہم

is darja mutmain hain tiri dosti se ham

mange agar to jan bhi denge khushi se ham

kah daliye jo ap ke dil mein hai be dharak

karte nahin hain bat kisi ki kisi se ham

hai un ki bat aur hai un ka hisab aur

waise to pyar karte hain har admi se ham

ya rab abhi bhi hai tiri rahmat pe etibar

be shak hain be hisab khafa zindagi se ham

achchhi lagen sabhi ko hamari nasihaten

kahte hain talkh bat bhi is sadgi se ham

hogi to jit us ki bahar hal ishq mein

kitna karen muqabla mardanagi se ham

rahta nahin mizaj hamesha to ek sa

kab tak sahenge jaur tire khamushi se ham

parwaz zindagi mein jo hona tha ho chuka

kyun jate jate tauba karen mai kashi se ham