میرا یہ خواب کہ تم میرے قریب آئی ہو

میرا یہ خواب کہ تم میرے قریب آئی ہو

اپنے سائے سے جھجکتی ہوئی گھبراتی ہوئی

اپنے احساس کی تحریک پہ شرماتی ہوئی

اپنے قدموں کی بھی آواز سے کتراتی ہوئی

اپنی سانسوں کے مہکتے ہوئے انداز لئے

اپنی خاموشی میں گہنائے ہوئے راز لئے

اپنے ہونٹوں پہ اک انجام کا آغاز لئے

دل کی دھڑکن کو بہت روکتی سمجھاتی ہوئی

اپنی پائل کی غزل خوانی پہ جھلاتی ہوئی

نرم شانوں پہ جوانی کا نیا بار لئے

شوخ آنکھوں میں حجابات سے انکار لئے

تیز نبضوں میں ملاقات کے آثار لئے

کالے بالوں سے بکھرتی ہوئی چمپا کی مہک

سرخ عارض پہ دمکتے ہوئے شالوں کی چمک

نیچی نظروں میں سمائی ہوئی خوددار جھجک

نقرئی جسم پہ وہ چاند کی کرنوں کی پھوار

چاندنی رات میں بجھتا ہوا پلکوں کا ستار

فرط جذبات سے مہکی ہوئی سانسوں کی قطار

دور ماضی کی بد انجام روایات لئے

نیچی نظریں وہی احساس ملاقات لئے

وہی ماحول وہی تاروں بھری رات لئے

آج تم آئی ہو دہراتی ہوئی ماضی کو

میرا یہ خواب کہ تم میرے قریب آئی ہو

کاش اک خواب رہے تلخ حقیقت نہ بنے

یہ ملاقات بھی دیوانے کی جنت نہ بنے

mera ye khwab ke tum mere qarib ai ho

apne sae se jhijakti hui ghabrati hui

apne ehsas ki tahrik pe sharmati hui

apne qadmon ki bhi awaz se katrati hui

apni sanson ke mahakte hue andaz liye

apni khamoshi mein gahnae hue raz liye

apne honton pe ik anjam ka aghaz liye

dil ki dharkan ko bahut rokti samjhati hui

apni pail ki ghazal khwani pe jhallati hui

narm shanon pe jawani ka naya bar liye

shokh ankhon mein hijabat se inkar liye

tez nabzon mein mulaqat ke asar liye

kale balon se bikharti hui champa ki mahak

surkh ariz pe damakte hue shalon ki chamak

nichi nazron mein samai hui khuddar jhijak

nuqrai jism pe wo chand ki kirnon ki phuar

chandni rat mein bujhta hua palkon ka sitar

fart-e-jazbat se mahki hui sanson ki qatar

dur mazi ki bad anjam riwayat liye

nichi nazren wahi ehsas-e-mulaqat liye

wahi mahaul wahi taron bhari rat liye

aj tum ai ho dohrati hui mazi ko

mera ye khwab ke tum mere qarib ai ho

kash ik khwab rahe talkh haqiqat na bane

ye mulaqat bhi diwane ki jannat na bane