Arooz is now on the App Store, for iPhone and iPad. Download →

All poetry

راحت بندۂ بے دام کہاں ہے آ جا

Shakeel Badayuni (1916–1970)

راحت بندۂ بے دام کہاں ہے آ جا

پیکر حسن سر بام کہاں ہے آ جا

رونق بزم ہے او جام کہاں ہے آ جا

زینت جلوہ گہ عام کہاں ہے آ جا

اے امید دل نا کام کہاں ہے آ جا

تیری فرقت خلل انداز سکون پیہم

تیری فرقت دل مایوس پہ اک طرفہ ستم

تیری فرقت سبب کاوش و بیداریٔ غم

تو نہیں ہے تو پھر آرام کہاں ہے آ جا

شاہد دور سیہ بخت و شب تار ہوں میں

خوگر نالۂ لذت کش آواز ہوں میں

دام طوفان حوادث میں گرفتار ہوں میں

روز و شب منتظر دید رخ یار ہوں میں

دل ہے وقف غم آلام کہاں ہے آ جا

شعلۂ بر کف گل داغ جگر تیرے بغیر

خار بردوش ہے دامان نظر تیرے بغیر

خوں فشاں ہے شب غم دیدۂ تر تیرے بغیر

چلن آتا ہی نہیں شام و سحر تیرے بغیر

منتظر ہوں سحر و شام کہاں ہے آ جا

دور تاریکیٔ غم سے شب تنہائی سے

دم بدم جوش جنوں کی ستم آرائی سے

کعبہ و دیر و کلیسا کی جبیں سائی سے

خوف مجبوری و ناکامی و رسوائی سے

عشق ہے لرزہ بر اندام کہاں ہے آ جا

منتشر ہونے لگی انجمن ناز حیات

بن گیا خواب ہر اک منظر آغاز حیات

دم شکستہ سا نظر آنے لگا ساز حیات

اب کوئی دم میں ہوا جاتا ہے وا راز حیات

آ گیا نزع کا ہنگام کہاں ہے آ جا