Arooz is now on the App Store, for iPhone and iPad. Download →

All poetry

مہیب لمبے گھنے پیڑوں کی ہری شاخیں

Shahryar (1936–2012)

مہیب لمبے گھنے پیڑوں کی ہری شاخیں

کبھی کبھی کوئی اشلوک گنگناتی تھیں

کبھی کبھی کسی پتے کا دل دھڑکتا تھا

کبھی کبھی کوئی کونپل درود پڑھتی تھی

کبھی کبھی کوئی جگنو الکھ جگاتا تھا

کبھی کبھی کوئی طائر ہوا سے لڑتا تھا

کبھی کبھی کوئی پرچھائیں چیخ پڑتی تھی

اور اس کے بعد مری آنکھ کھل گئی میں نے

سرہانے رکھے ہوئے تازہ روز نامے کی

ہر ایک سطر بڑے غور سے پڑھی لیکن

خبر کہیں بھی کسی ایسے حادثے کی نہ تھی

اور اس کے بعد میں دیوانہ وار ہنسنے لگا

اور اس کے بعد ہر اک سمت لا زوال سکوت

اور اس کے بعد ہر اک سمت لا زوال سکوت