Arooz is now on the App Store, for iPhone and iPad. Download →

All poetry

برف بے موسم گری

Shahryar (1936–2012)

برف بے موسم گری

چٹان سے میدان تک

بے درختوں کی زمیں

بے اون بھیڑوں کے لیے

زندہ رہنا اور مرنا دونوں مشکل ہو گئے

آنکھ بے منظر خلا کو

تکتے تکتے تھک گئی

وقت کی رفتار کو

بتلانے والی سوئیاں

ہندسوں کی بے صلہ بے کار گردش کرتے کرتے رک گئیں

آڑے ترچھے اونچے نیچے راستے

برف کی موٹی تہوں میں چھپ گئے

پھر سفر بے سمت بے منزل ہوا

برف کے اجلے بدن کی

منحنی نیلی رگوں میں

کون سورج بن کے دوڑے

کس طرح یہ برف پگھلے

آگ بہ شعلہ ہوئی

پھر سفر بے سمت بے منزل ہوا

بے اون بھیڑوں کے لیے

زندہ رہنا اور مرنا دونوں مشکل ہو گئے