چھپی ہوئی کہیں سجدوں میں سرکشی تو نہیں

چھپی ہوئی کہیں سجدوں میں سرکشی تو نہیں

یہ میری رسم عبادت بھی بندگی تو نہیں

بغیر وجہ یہ ساقی کی بے رخی تو نہیں

میں سوچتا ہوں کہیں کچھ خطا ہوئی تو نہیں

میں مطمئن ہوں مگر صرف یہ بتا دیجے

یہ غم جو آپ نے بخشا ہے عارضی تو نہیں

سبھی کے دل میں محبت کی آگ ہوتی ہے

سبھی کو راس بھی آئے یہ لازمی تو نہیں

اجل کا چہرہ نظر آئے کچھ بندھے ڈھارس

رہ حیات میں اتنی بھی روشنی تو نہیں

تصورات میں کچھ دیر کھو تو جاتا ہوں

مگر اب ان میں بھی اگلی سی دل کشی تو نہیں

چمن وہی ہے بہاریں وہی ہیں گل بھی وہی

مگر گلوں میں وہ خوشبو وہ تازگی تو نہیں

ہر ایک چیز نظر آتی ہے اداس اداس

کہیں یہ میرے ہی احساس کی کمی تو نہیں

یہ سارے رنج بقید حیات ہی تو نہیں

حیات میری کوئی عمر خضر کی تو نہیں

کسی پہ برسے کوئی بوند بوند کو ترسے

یہ اور جو بھی ہو ساقی کی منصفی تو نہیں

کبھی جو نورؔ کوئی رشتۂ وفا ٹوٹے

یہ دیکھ لینا کہ آنکھوں میں کچھ نمی تو نہیں

chhupi hui kahin sajdon mein sarkashi to nahin

ye meri rasm-e-ibadat bhi bandagi to nahin

baghair wajh ye saqi ki be rukhi to nahin

main sochta hun kahin kuchh khata hui to nahin

main mutmain hun magar sirf ye bata dije

ye gham jo ap ne bakhsha hai arzi to nahin

sabhi ke dil mein mohabbat ki ag hoti hai

sabhi ko ras bhi ae ye lazmi to nahin

ajal ka chehra nazar ae kuchh bandhe dharas

rah-e-hayat mein itni bhi raushni to nahin

tasawwurat mein kuchh der kho to jata hun

magar ab un mein bhi agli si dil kashi to nahin

chaman wahi hai baharen wahi hain gul bhi wahi

magar gulon mein wo khushbu wo tazgi to nahin

har ek chiz nazar ati hai udas udas

kahin ye mere hi ehsas ki kami to nahin

ye sare ranj baqaid-e-hayat hi to nahin

hayat meri koi umr-e-khizr ki to nahin

kisi pe barse koi bund bund ko tarse

ye aur jo bhi ho saqi ki munsifi to nahin

kabhi jo nur koi rishta-e-wafa tute

ye dekh lena ke ankhon mein kuchh nami to nahin