ابھی ابھی اک ہوا کا جھونکا

ابھی ابھی اک ہوا کا جھونکا

جو تیرا لہجہ

جو تیرے گیتوں پہیلیوں کا امین بن کر

سماعتوں کو

ہزار لفظوں کی داستانیں سنا گیا ہے

ابھی ابھی بے کراں سا لمحہ

جو کتنی صدیوں کا بوجھ اٹھائے

گزر گیا ہے

جو میری آنکھوں میں سوئے منظر جگا گیا ہے

ابھی ابھی تیرا اک صحیفہ اک عہد بن کر

دیار دل میں اتر گیا ہے

مرا بدن ریزہ ریزہ ہو کر بکھر گیا ہے

میں دیکھتا ہوں

کہ نام تیرا

زبان تیری

کلام تیرا

زمیں کی پستی سے

آسماں کی بلندیوں تک

ہر آنے والے نصاب لمحے کا

پیشوا ہے

میں سوچتا ہوں

کہ تجھ پہ لکھوں

جو تجھ پہ لکھا

تو حرف میرے

ہوا میں تحلیل ہو گئے ہیں

میں چاہتا ہوں

کہ تجھ کو سوچوں

جو تجھ کو سوچا

تو ذات تیری

پہیلیوں میں الجھ گئی ہے

abhi abhi ik hawa ka jhonka

jo tera lahja

jo tere giton paheliyon ka amin ban kar

samaaton ko

hazar lafzon ki dastanen suna gaya hai

abhi abhi be karan sa lamha

jo kitni sadiyon ka bojh uthae

guzar gaya hai

jo meri ankhon mein su-e-manzar jaga gaya hai

abhi abhi tera ik sahifa ik ahd ban kar

dayar-e-dil mein utar gaya hai

mira badan reza reza ho kar bikhar gaya hai

main dekhta hun

ke nam tera

zaban teri

kalam tera

zamin ki pasti se

asman ki bulandiyon tak

har ane wale nisab lamhe ka

peshwa hai

main sochta hun

ke tujh pe likhun

jo tujh pe likha

tu harf mere

hawa mein tahlil ho gae hain

main chahta hun

ke tujh ko sochun

jo tujh ko socha

tu zat teri

paheliyon mein ulajh gai hai