Arooz is now on the App Store, for iPhone and iPad. Download →

All poetry

میری ننھی بچی مجھ سے کہتی ہے

Saleem Kausar

میری ننھی بچی مجھ سے کہتی ہے

ابو رات گئے تک آخر جاگتے کیوں ہو

بیٹی میں راتوں کو اکثر شعر لکھا کرتا ہوں

میری بچی حیرت سے مجھ کو تکتی ہے

اور کہتی ہے

ابو

ایسے شعر نہ لکھو

جن کو لکھنے کی پاداش میں راتوں کو بھی نیند نہ آئے

ہاں بیٹی تم سچ کہتی ہو

لیکن بات ہی کچھ ایسی ہے

میں جو سچے شعر لکھوں گا

لوگ تمہیں زندہ جانیں گے

دنیا تم سے پیار کرے گی

اچھے ابو

ایسا ہے تو

آج سے پھر ہم بھی جاگیں گے