اسے کہنا
Saleem Kausarاسے کہنا
کبھی ملنے چلا آئے
ہمارے پاؤں میں جو راستہ تھا
راستے میں پیڑ تھے
پیڑوں پہ جتنی طائروں کی ٹولیاں
ہم سے ملا کرتی تھیں
اب وہ اڑتے اڑتے تھک گئی ہیں
وہ گھنی شاخیں جو ہم پر سایا کرتی تھیں
وہ سب مرجھا گئی ہیں
تم اسے کہنا
کبھی ملنے چلا آئے
لبوں پر لفظ ہیں
لفظوں میں کوئی داستاں قصہ کہانی
جو اسے اکثر سناتے تھے
کسے جا کر سنائیں گے
بتائیں گے
کہ ہم محراب ابرو میں ستارے ٹانکنے والے
در لب بوسۂ اظہار کی دستک سے اکثر کھولنے والے
کبھی بکھری ہوئی زلفوں میں ہم
مہتاب کے گجرے بنا کر باندھنے والے
چراغ اور آئنے کے درمیاں
کب سے سر ساحل کھڑے موجوں کو تکتے ہیں
اسے کہنا
اسے ہم یاد کرتے ہیں
اسے کہنا
ہم آ کر خود اسے ملتے
مگر مقتل بدلتے موسموں کے خون میں رنگین ہے
اور ہم
قطار اندر قطار ایسے بہت سے موسموں کے درمیاں
تنہا کھڑے ہیں
جانے کب اپنا بلاوا ہو
کہ ہم میں آج بھی
اک عمر کی وارفتگی اور وحشتوں کا رقص جاری ہے
وہ بازی جو بساط جاں پہ کھیلی تھی
ابھی ہم نے نہ جیتی ہے نہ ہاری ہے
اسے کہنا کبھی ملنے چلا آئے
کہ اب کی بار شاید
اپنی باری ہے
use kahna
kabhi milne chala ae
hamare paon mein jo rasta tha
raste mein per the
peron pe jitni tairon ki toliyan
ham se mila karti thin
ab wo urte urte thak gai hain
wo ghani shakhen jo ham par saya karti thin
wo sab murjha gai hain
tum use kahna
kabhi milne chala ae
labon par lafz hain
lafzon mein koi dastan qissa kahani
jo use aksar sunate the
kise ja kar sunaenge
bataenge
ke ham mehrab-e-abru mein sitare tankne wale
dar lab bosa-e-izhar ki dastak se aksar kholne wale
kabhi bikhri hui zulfon mein ham
mahtab ke gajre bana kar bandhne wale
charagh aur aine ke darmiyan
kab se sar-e-sahil khare maujon ko takte hain
use kahna
use ham yad karte hain
use kahna
ham a kar khud use milte
magar maqtal badalte mausamon ke khun mein rangin hai
aur ham
qatar andar qatar aise bahut se mausamon ke darmiyan
tanha khare hain
jane kab apna bulawa ho
ke ham mein aj bhi
ik umr ki waraftagi aur wahshaton ka raqs jari hai
wo bazi jo bisat-e-jan pe kheli thi
abhi ham ne na jiti hai na hari hai
use kahna kabhi milne chala ae
ke ab ki bar shayad
apni bari hai