سال کی آخری شب

سال کی آخری شب

میرے کمرے میں کتابوں کا ہجوم

پچھلی راتوں کو تراشے ہوئے کچھ ماہ و نجوم

میں اکیلا مرے اطراف علوم

ایک تصویر پہ بنتے ہوئے میرے خد و خال

ان پہ جمتی ہوئی گرد مہ و سال

اک ہیولیٰ سا پس شہر غبار

اور مجھے جکڑے ہوئے خود مری باہوں کے حصار

کوئی روزن ہے نہ در

سو گئے اہل خبر

سال کی آخری شب

نہ کسی ہجر کا صدمہ نہ کسی وصل کا خواب

خم ہونے کو ہے بس آخری لمحے کا شباب

اور افق پار دھندلکوں سے کہیں

کھلنے والا ہے نئی صبح کا باب

اس نئی صبح کو کیا نذر کروں

ہر طرف پھیلا ہوا تیز ہواؤں کا فسوں

اور میں سوچتا ہوں

در و دیوار میں لپٹے ہوئے سہمے ہوئے لوگ

گلی کوچوں میں نکلتے ہوئے گھبراتے ہوئے

میں انہیں کیسے بتاؤں کہ یہی موسم ہے

جب پرندوں کے پر و بال نکل آتے ہیں

sal ki akhiri shab

mere kamre mein kitabon ka hujum

pichhli raton ko tarashe hue kuchh mah-o-nujum

main akela mire atraf ulum

ek taswir pe bante hue mere khad-o-khal

un pe jamti hui gard-e-mah-o-sal

ik hayula sa pas shahr ghubar

aur mujhe jakre hue khud miri bahon ke hisar

koi rauzan hai na dar

so gae ahl-e-khabar

sal ki akhiri shab

na kisi hijr ka sadma na kisi wasl ka khwab

kham hone ko hai bas akhiri lamhe ka shabab

aur ufuq par dhundalkon se kahin

khulne wala hai nai subh ka bab

is nai subh ko kya nazr karun

har taraf phaila hua tez hawaon ka fusun

aur main sochta hun

dar-o-diwar mein lipte hue sahme hue log

gali kuchon mein nikalte hue ghabrate hue

main unhen kaise bataun ke yahi mausam hai

jab parindon ke par-o-bal nikal ate hain