بہت گھٹن ہے کوئی صورت بیاں نکلے — ساحر لدھیانوی (Sahir Ludhianvi)

بہت گھٹن ہے کوئی صورت بیاں نکلے

اگر صدا نہ اٹھے کم سے کم فغاں نکلے

فقیر شہر کے تن پر لباس باقی ہے

امیر شہر کے ارماں ابھی کہاں نکلے

حقیقتیں ہیں سلامت تو خواب بہتیرے

اداس کیوں ہو جو کچھ خواب رائیگاں نکلے

وہ فلسفے جو ہر اک آستاں کے دشمن تھے

عمل میں آئے تو خود وقف آستاں نکلے

ادھر بھی خاک اڑی ہے ادھر بھی زخم پڑے

جدھر سے ہو کے بہاروں کے کارواں نکلے

ستم کے دور میں ہم اہل دل ہی کام آئے

زباں پہ ناز تھا جن کو وہ بے زباں نکلے