دبے گی کب تلک آواز آدم ہم بھی دیکھیں گے

دبے گی کب تلک آواز آدم ہم بھی دیکھیں گے

رکیں گے کب تلک جذبات برہم ہم بھی دیکھیں گے

چلو یوں ہی سہی یہ جور پیہم ہم بھی دیکھیں گے

در زنداں سے دیکھیں یا عروج دار سے دیکھیں

تمہیں رسوا سر بازار عالم ہم بھی دیکھیں گے

ذرا دم لو مآل شوکت جم ہم بھی دیکھیں گے

یہ زعم قوت فولاد و آہن دیکھ لو تم بھی

بہ فیض جذبہ ایمان محکم ہم بھی دیکھیں گے

جبین کج کلاہی خاک پر خم ہم بھی دیکھیں گے

مکافات عمل تاریخ انساں کی روایت ہے

کرو گے کب تلک ناوک فراہم ہم بھی دیکھیں گے

کہاں تک ہے تمہارے ظلم میں دم ہم بھی دیکھیں گے

یہ ہنگام وداع شب ہے اے ظلمت کے فرزندو

سحر کے دوش پر گل نار پرچم ہم بھی دیکھیں گے

تمہیں بھی دیکھنا ہوگا یہ عالم ہم بھی دیکھیں گے

dabe gi kab talak awaz-e-adam ham bhi dekhenge

rukenge kab talak jazbat barham ham bhi dekhenge

chalo yun hi sahi ye jaur-e-paiham ham bhi dekhenge

dar-e-zindan se dekhen ya uruj-e-dar se dekhen

tumhen ruswa sar bazar-e-alam ham bhi dekhenge

zara dam lo maal-e-shaukat-e-jam ham bhi dekhenge

ye zaam-e-quwwat-e-faulad-o-ahan dekh lo tum bhi

ba faiz-e-jazba iman-e-mohkam ham bhi dekhenge

jabin-e-kaj kulahi khak par kham ham bhi dekhenge

mukafat-e-amal tarikh insan ki riwayat hai

karoge kab talak nawak faraham ham bhi dekhenge

kahan tak hai tumhare zulm mein dam ham bhi dekhenge

ye hangam-e-wida-e-shab hai ai zulmat ke farzando

sahar ke dosh par gul nar-e-parcham ham bhi dekhenge

tumhen bhi dekhna hoga ye alam ham bhi dekhenge