آپ بے وجہ پریشان سی کیوں ہیں مادام

آپ بے وجہ پریشان سی کیوں ہیں مادام

لوگ کہتے ہیں تو پھر ٹھیک ہی کہتے ہوں گے

میرے احباب نے تہذیب نہ سیکھی ہوگی

میرے ماحول میں انسان نہ رہتے ہوں گے

نور سرمایہ سے ہے روئے تمدن کی جلا

ہم جہاں ہیں وہاں تہذیب نہیں پل سکتی

مفلسی حس لطافت کو مٹا دیتی ہے

بھوک آداب کے سانچوں میں نہیں ڈھل سکتی

لوگ کہتے ہیں تو لوگوں پہ تعجب کیسا

سچ تو کہتے ہیں کہ ناداروں کی عزت کیسی

لوگ کہتے ہیں مگر آپ ابھی تک چپ ہیں

آپ بھی کہئے غریبوں میں شرافت کیسی

نیک مادام بہت جلد وہ دور آئے گا

جب ہمیں زیست کے ادوار پرکھنے ہوں گے

اپنی ذلت کی قسم آپ کی عظمت کی قسم

ہم کو تعظیم کے معیار پرکھنے ہوں گے

ہم نے ہر دور میں تذلیل سہی ہے لیکن

ہم نے ہر دور کے چہرے کو ضیا بخشی ہے

ہم نے ہر دور میں محنت کے ستم جھیلے ہیں

ہم نے ہر دور کے ہاتھوں کو حنا بخشی ہے

لیکن ان تلخ مباحث سے بھلا کیا حاصل

لوگ کہتے ہیں تو پھر ٹھیک ہی کہتے ہوں گے

میرے احباب نے تہذیب نہ سیکھی ہوگی

میں جہاں ہوں وہاں انسان نہ رہتے ہوں گے

وجہ بے رنگیٔ گلزار کہوں یا نہ کہوں

کون ہے کتنا گنہ گار کہوں یا نہ کہوں

ap be wajh pareshan si kyun hain madam

log kahte hain to phir thik hi kahte honge

mere ahbab ne tahzib na sikhi hogi

mere mahaul mein insan na rahte honge

nur sarmaya se hai ru-e-tamaddun ki jala

ham jahan hain wahan tahzib nahin pal sakti

muflisi his-e-latafat ko mita deti hai

bhuk adab ke sanchon mein nahin dhal sakti

log kahte hain to logon pe taajjub kaisa

sach to kahte hain ke nadaron ki izzat kaisi

log kahte hain magar ap abhi tak chup hain

ap bhi kahiye gharibon mein sharafat kaisi

nek madam bahut jald wo dur aega

jab hamen zist ke adwar parakhne honge

apni zillat ki qasam ap ki azmat ki qasam

ham ko taazim ke meyar parakhne honge

ham ne har daur mein tazlil sahi hai lekin

ham ne har daur ke chehre ko ziya bakhshi hai

ham ne har daur mein mehnat ke sitam jhele hain

ham ne har daur ke hathon ko hina bakhshi hai

lekin un talkh mubahis se bhala kya hasil

log kahte hain to phir thik hi kahte honge

mere ahbab ne tahzib na sikhi hogi

main jahan hun wahan insan na rahte honge

wajh-e-be rangi-e-gulzar kahun ya na kahun

kaun hai kitna gunah gar kahun ya na kahun