میری ناکام محبت کی کہانی مت چھیڑ

میری ناکام محبت کی کہانی مت چھیڑ

اپنی مایوس امنگوں کا فسانہ نہ سنا

زندگی تلخ سہی زہر سہی سم ہی سہی

درد و آزار سہی جبر سہی غم ہی سہی

لیکن اس درد و غم و جبر کی وسعت کو تو دیکھ

ظلم کی چھاؤں میں دم توڑتی خلقت کو تو دیکھ

اپنی مایوس امنگوں کا فسانہ نہ سنا

میری ناکام محبت کی کہانی مت چھیڑ

جلسہ گاہوں میں یہ دہشت زدہ سہمے انبوہ

رہ گزاروں پہ فلاکت زدہ لوگوں کے گروہ

بھوک اور پیاس سے پژمردہ سیہ فام زمیں

تیرہ و تار مکاں مفلس و بیمار مکیں

نوع انساں میں یہ سرمایہ و محنت کا تضاد

امن و تہذیب کے پرچم تلے قوموں کا فساد

ہر طرف آتش و آہن کا یہ سیلاب عظیم

نت نئے طرز پہ ہوتی ہوئی دنیا تقسیم

لہلہاتے ہوئے کھیتوں پہ جوانی کا سماں

اور دہقان کے چھپر میں نہ بتی نہ دھواں

یہ فلک بوس ملیں دل کش و سیمیں بازار

یہ غلاظت پہ جھپٹتے ہوئے بھوکے نادار

دور ساحل پہ وہ شفاف مکانوں کی قطار

سرسراتے ہوئے پردوں میں سمٹتے گل زار

در و دیوار پہ انوار کا سیلاب رواں

جیسے اک شاعر مدہوش کے خوابوں کا جہاں

یہ سبھی کیوں ہے یہ کیا ہے مجھے کچھ سوچنے دے

کون انساں کا خدا ہے مجھے کچھ سوچنے دے

اپنی مایوس امنگوں کا فسانہ نہ سنا

میری ناکام محبت کی کہانی مت چھیڑ

meri nakam-e-mohabbat ki kahani mat chher

apni mayus umangon ka fasana na suna

zindagi talkh sahi zahr sahi sam hi sahi

dard-o-azar sahi jabr sahi gham hi sahi

lekin is dard-o-gham-o-jabr ki wusat ko to dekh

zulm ki chhaon mein dam torti khilqat ko to dekh

apni mayus umangon ka fasana na suna

meri nakam-e-mohabbat ki kahani mat chher

jalsa gahon mein ye dahshat zada sahme amboh

rah guzaron pe falakat zada logon ke giroh

bhuk aur pyas se pazhmurda siyah fam zamin

tira-o-tar makan muflis-o-bimar makin

nau-e-insan mein ye sarmaya-o-mehnat ka tazad

amn-o-tahzib ke parcham tale qaumon ka fasad

har taraf atish-o-ahan ka ye sailab-e-azim

nit nae tarz pe hoti hui duniya taqsim

lahlahate hue kheton pe jawani ka saman

aur dehqan ke chhappar mein na batti na dhuan

ye falak bos milen dil kash-o-simin bazar

ye ghilazat pe jhapatte hue bhuke nadar

dur sahil pe wo shaffaf makanon ki qatar

sirasrate hue pardon mein simatte gul zar

dar-o-diwar pe anwar ka sailab rawan

jaise ik shayar-e-madhosh ke khwabon ka jahan

ye sabhi kyun hai ye kya hai mujhe kuchh sochne de

kaun insan ka khuda hai mujhe kuchh sochne de

apni mayus umangon ka fasana na suna

meri nakam-e-mohabbat ki kahani mat chher