آؤ کہ آج غور کریں اس سوال پر

آؤ کہ آج غور کریں اس سوال پر

دیکھے تھے ہم نے جو وہ حسیں خواب کیا ہوئے

دولت بڑھی تو ملک میں افلاس کیوں بڑھا

خوشحالئ عوام کے اسباب کیا ہوئے

جو اپنے ساتھ ساتھ چلے کوئے دار تک

وہ دوست وہ رفیق وہ احباب کیا ہوئے

کیا مول لگ رہا ہے شہیدوں کے خون کا

مرتے تھے جن پہ ہم وہ سزا یاب کیا ہوئے

بے کس برہنگی کو کفن تک نہیں نصیب

وہ وعدہ ہائے اطلس و کمخواب کیا ہوئے

جمہوریت نواز بشر دوست امن خواہ

خود کو جو خود دیے تھے وہ القاب کیا ہوئے

مذہب کا روگ آج بھی کیوں لا علاج ہے

وہ نسخہ ہائے نادر و نایاب کیا ہوئے

ہر کوچہ شعلہ زار ہے ہر شہر قتل گاہ

یکجہتئ حیات کے آداب کیا ہوئے

صحرائے تیرگی میں بھٹکتی ہے زندگی

ابھرے تھے جو افق پہ وہ مہتاب کیا ہوئے

مجرم ہوں میں اگر تو گنہ گار تم بھی ہو

اے رہبران قوم خطا کار تم بھی ہو

ao ke aj ghaur karen is sawal par

dekhe the ham ne jo wo hasin khwab kya hue

daulat barhi to mulk mein iflas kyun barha

khushhali-e-awam ke asbab kya hue

jo apne sath sath chale ku-e-dar tak

wo dost wo rafiq wo ahbab kya hue

kya mol lag raha hai shahidon ke khun ka

marte the jin pe ham wo saza yab kya hue

be kis barahnagi ko kafan tak nahin nasib

wo waada ha-e-atlas-o-kamkhwab kya hue

jamhuriyat nawaz bashar dost amn khwah

khud ko jo khud diye the wo alqab kya hue

mazhab ka rog aj bhi kyun la ilaj hai

wo nuskha ha-e-nadir-o-nayab kya hue

har kucha shola zar hai har shahr-e-qatl gah

yakjihati-e-hayat ke adab kya hue

sahra-e-tirgi mein bhatakti hai zindagi

ubhre the jo ufuq pe wo mahtab kya hue

mujrim hun main agar to gunah gar tum bhi ho

ai rahbaran-e-qaum khata kar tum bhi ho