محتاج دید و جلوہ کروں کیوں نظر کو میں

محتاج دید و جلوہ کروں کیوں نظر کو میں

نظروں میں کھینچ لاتا ہوں جب جلوہ گر کو میں

دیکھوں تو جرم اور نہ دیکھوں تو کفر ہے

اب کیا کہوں جمال رخ فتنہ گر کو میں

ایسا نہیں کہ دل میں مرے زخم ہی نہ ہو

آنکھوں میں روک لیتا ہوں خون جگر کو میں

دامان صبر چھوٹنے لگتا ہے ہاتھ سے

جب دیکھتا ہوں دوریٔ شام و سحر کو میں

منزل پہ آ کے آج یہ سمجھا کہ آج تک

منزل سمجھ رہا تھا فقط رہ گزر کو میں

منزل کی جستجو میں نہ جانے کہاں کہاں

سر پر لئے پھرا ہوں غبار سفر کو میں

اک قصر آرزو تھا گرا ٹوٹ ٹوٹ کر

حسرت سے دیکھتا رہا دیوار و در کو میں

ملنے کو نورؔ یوں تو بہت غم یہاں ملے

ترسا تمام عمر غم معتبر کو میں

mohtaj-e-did-o-jalwa karun kyun nazar ko main

nazron mein khinch lata hun jab jalwa gar ko main

dekhun to jurm aur na dekhun to kufr hai

ab kya kahun jamal-e-rukh-e-fitna gar ko main

aisa nahin ke dil mein mire zakhm hi na ho

ankhon mein rok leta hun khun-e-jigar ko main

daman-e-sabr chhutne lagta hai hath se

jab dekhta hun duri-e-sham-o-sahar ko main

manzil pe a ke aj ye samjha ke aj tak

manzil samajh raha tha faqat rah guzar ko main

manzil ki justuju mein na jane kahan kahan

sar par liye phira hun ghubar-e-safar ko main

ik qasr-e-arzu tha gira tut tut kar

hasrat se dekhta raha diwar-o-dar ko main

milne ko nur yun to bahut gham yahan mile

tarsa tamam umr-e-gham-e-motabar ko main