کہا ماسٹر جی نے منے سے اک دن — قتیل شفائی (Qateel Shifai)

کہا ماسٹر جی نے منے سے اک دن

کرو کام پورا جو ہم نے کہا ہے

بنا لاؤ تصویر اس نام کی تم

کہ بھینسا چراگاہ میں چر رہا ہے

نہ گزرے تھے اس بات کو دو منٹ بھی

کہ منے نے تصویر تیار کر دی

وہ تصویر کیا تھی فقط سادہ کاغذ

نہ تھی جس پہ سرخی نہ سبزی نہ زردی

جو پوچھا گیا بھئی کہاں ہے چراگاہ

تو فرمایا بھینسا اسے چر گیا ہے

جو پوچھا گیا پھر کہاں ہے وہ بھینسا

کہا دور جا کر کہیں مر گیا ہے