پھر وہی بڑھتے ہوئے رکتے ہوئے قدموں کی چاپ

پھر وہی بڑھتے ہوئے رکتے ہوئے قدموں کی چاپ

پھر وہی سہمی ہوئی سمٹی ہوئی سرگوشیاں

پھر وہی بہکی ہوئی مہکی ہوئی سی آہٹیں

پھر وہی گاتی سی لہراتی سی کچھ مدہوشیاں

زندگی طوفان تھی سیلاب تھی بھونچال تھی

وقت پھر بھی کروٹوں پر کروٹیں لیتا رہا

قافلے اس راہ پر آتے رہے جاتے رہے

راہ بر سب کو مسافت کا صلہ دیتا رہا

وہ تبسم جس کو روتے ہیں کئی اجڑے سہاگ

بن رہا ہے اک لچکتا خار اپنے پاؤں میں

وہ نظر جو کل تلک ہر جسم کو ڈستی رہی

آج سستانے لگی ہے مصلحت کی چھاؤں میں

کتنی امیدوں کے مدفن اس کے ہاتھوں بن چکے

کتنے ارمانوں کے لاشے اس نے خود کفنائے ہیں

آہ یہ مقتل کہ جس کے پاسبانی کے لیے!

کتنے مستقبل فنا کے دوش پر لہرائے ہیں

کلفتوں سے تنگ آ کر بے خودی کی کھوج میں

قافلے اس راہ پر آتے رہیں جاتے رہیں

راہ بر سب کو مسافت کا صلہ دیتا رہے

راہرو اپنے تجسس کا صلہ پاتے رہیں

phir wahi barhte hue rukte hue qadmon ki chap

phir wahi sahmi hui simti hui sargoshiyan

phir wahi bahki hui mahki hui si ahaten

phir wahi gati si lahrati si kuchh madhoshiyan

zindagi tufan thi sailab thi bhaunchal thi

waqt phir bhi karwaton par karwaten leta raha

qafile is rah par ate rahe jate rahe

rah bar sab ko masafat ka sila deta raha

wo tabassum jis ko rote hain kai ujre suhag

ban raha hai ik lachakta khar apne paon mein

wo nazar jo kal talak har jism ko dasti rahi

aj sustane lagi hai maslahat ki chhaon mein

kitni ummidon ke madfan us ke hathon ban chuke

kitne armanon ke lashe us ne khud kafnae hain

ah ye maqtal ke jis ke pasbani ke liye!

kitne mustaqbil fana ke dosh par lahrae hain

kulfaton se tang a kar be khudi ki khoj mein

qafile is rah par ate rahen jate rahen

rah bar sab ko masafat ka sila deta rahe

rahrau apne tajassus ka sila pate rahen