زندگی کی کیفیت اب یہ ہے خاص و عام کی

زندگی کی کیفیت اب یہ ہے خاص و عام کی

صبح کو ہوتی ہے جو حالت چراغ شام کی

کھا رہے ہیں روٹیاں جو چین سے آرام کی

لکھ رہے ہیں کیفیت وہ گردش ایام کی

جس میں سب ننگے ہیں جو ننگا نہیں وہ بھی شمار

اور یہی اک خاصیت ہے اپنے اس حمام کی

چہرۂ حالات کو اچھی طرح پڑھ اور پھر

آج کی دنیا بتا راون کی ہے کہ رام کی

آشتی آہستگی زندہ دلی افتادگی

زندگی میں گر نہیں تو زندگی کس کام کی

فلسفے اور فلسفوں کا حل سبھی مل جائے گا

بیٹھ فرصت سے رباعیات پڑھ خیام کی

کس تجسس میں سعادتؔ اور کس تحقیق میں

صبح اپنی دوپہر کی دوپہر کی شام کی

zindagi ki kaifiyat ab ye hai khas-o-am ki

subh ko hoti hai jo halat charagh-e-sham ki

kha rahe hain rotiyan jo chain se aram ki

likh rahe hain kaifiyat wo gardish-e-ayyam ki

jis mein sab nange hain jo nanga nahin wo bhi shumar

aur yahi ik khasiyyat hai apne is hammam ki

chehra-e-halat ko achchhi tarah parh aur phir

aj ki duniya bata rawan ki hai ke ram ki

ashti ahistagi zinda dili uftadagi

zindagi mein gar nahin to zindagi kis kam ki

falsafe aur falsafon ka hal sabhi mil jaega

baith fursat se rubaiyat parh khayyam ki

kis tajassus mein saadat aur kis tahqiq mein

subh apni dopahar ki dopahar ki sham ki