خزاں موسم نہیں ہے

خزاں موسم نہیں ہے

ایک لمحہ ہے کہ جس کی آرزو میں

سبز پتے

ہوا کی آہٹوں پر کان دھرتے ہیں

گزرتے وقت میں ساعت بہ ساعت

نئے پیراہنوں میں

گلابی اور گہرے سرخ عنابی

دہکتے خوش نما رنگوں سے لے کر زرد ہونے تک

کبھی دھیمے کبھی اونچے سروں میں بات کرتی

خوشبوؤں میں بس بسا کر

ہوا کے ساتھ محو رقص ہونا چاہتے ہیں

زمیں کا رزق بن جانے سے پہلے

وہی اک اجنبی وارفتگی اور رقص کا لمحہ

کہیں پر دور آئندہ کے موسم کی سماعت میں

کسی سوئے ہوئے اک بیج میں

خواہش نمو کی سر اٹھاتی ہے

بہت ہی پیار سے ہر شاخ کے پتے سے کہتی ہے

کہ اب رزق زمیں بن کر

کسی اک نرم کونپل کی نمو کا آسرا بن جا

خزاں موسم نہیں ہے

اک مسرت خیز تخلیق‌‌ عمل کا آسرا ہے

khizan mausam nahin hai

ek lamha hai ke jis ki arzu mein

sabz patte

hawa ki ahaton par kan dharte hain

guzarte waqt mein saat ba saat

nae pairahanon mein

gulabi aur gahre surkh unnabi

dahakte khush numa rangon se le kar zard hone tak

kabhi dhime kabhi unche saron mein bat karti

khushbuon mein bas basa kar

hawa ke sath mahw-e-raqs hona chahte hain

zamin ka rizq ban jane se pahle

wahi ik ajnabi waraftagi aur raqs ka lamha

kahin par dur ainda ke mausam ki samaat mein

kisi soe hue ik bij mein

khwahish numu ki sar uthati hai

bahut hi pyar se har shakh ke patte se kahti hai

ke ab rizq zamin ban kar

kisi ik narm konpal ki numu ka asra ban ja

khizan mausam nahin hai

ik masarrat khez takhliq amal ka asra hai