فضا ایسی بہ فیض باغباں معلوم ہوتی ہے

فضا ایسی بہ فیض باغباں معلوم ہوتی ہے

بہار گلستاں مثل خزاں معلوم ہوتی ہے

کچھ اپنوں کا کرم ہے کچھ نگاہ عصر حاضر ہے

حیات اک حسرتوں کی داستاں معلوم ہوتی ہے

عجب تحقیر سی تفریق و بے زاری سی نفرت سی

درون قلب میر کارواں معلوم ہوتی ہے

دلوں میں مسجدوں میں مندروں میں درس گاہوں میں

سیاست ہی سیاست حکمراں معلوم ہوتی ہے

گرانی رشوتیں گھپلے غبن افساد گولی بم

یہی آزادیٔ ہندوستاں معلوم ہوتی ہے

خوشامد اس قدر بھی ساتھیو اچھی نہیں لگتی

تمہارے منہ میں اوروں کی زباں معلوم ہوتی ہے

سعادتؔ جھانک ان کے دل میں خود نفرت بھری ہوگی

یہ دنیا جن کو نفرت کا جہاں معلوم ہوتی ہے

faza aisi ba faiz-e-baghban maalum hoti hai

bahar-e-gulsitan misl-e-khizan maalum hoti hai

kuchh apnon ka karam hai kuchh nigah-e-asr-e-hazir hai

hayat ik hasraton ki dastan maalum hoti hai

ajab tahqir si tafriq-o-be zari si nafrat si

darun-e-qalb-e-mir-e-karwan maalum hoti hai

dilon mein masjidon mein mandiron mein dars-e-gahon mein

siyasat hi siyasat hukmaran maalum hoti hai

girani rishwaten ghpale ghaban ifsad goli bam

yahi azadi-e-hindostan maalum hoti hai

khushamad is qadar bhi sathiyo achchhi nahin lagti

tumhare munh mein auron ki zaban maalum hoti hai

saadat jhank un ke dil mein khud nafrat bhari hogi

ye duniya jin ko nafrat ka jahan maalum hoti hai