تو ہے آب زندگی تو ہے شباب‌ زندگی — Saadat Aabidi

Arooz is now on the App Store, for iPhone and iPad. Download →

تو ہے آب زندگی تو ہے شباب‌ زندگی

تجھ سے ہی سب کیف ہے تو ہے شراب زندگی

تیرا آنا ہے طلوع ماہتاب زندگی

اور ترا جانا غروب آفتاب زندگی

تیرا جانا ٹوٹنا تار رباب زندگی

تو اگر آ جائے تو کھل جائے باب زندگی

زندگی ملتی ہے بس اس کو جسے مل جائے تو

دیکھتے ہیں یوں تو لاکھوں لوگ خواب زندگی

اطمینان قلب سے وہ لوگ ہیں نا آشنا

جن کو یہ ڈر ہے کہ دینا ہے حساب زندگی

اک مکمل عبرتوں کا درس دیتی ہے جناب

پڑھ کے دیکھیں تو کبھی اپنی کتاب زندگی

اے سعادتؔ ان کو پینے کا بھی کوئی حق نہیں

تلخ جن لوگوں کو لگتی ہے شراب زندگی