شہر کے شہر کا افسانہ وہ خوش فہم مگر سادہ مسافر

شہر کے شہر کا افسانہ وہ خوش فہم مگر سادہ مسافر

کہ جنہیں عشق کی للکار کے رہزن نے کہا: آؤ!

دکھلائیں تمہیں ایک در بستہ کے اسرار کا خواب

شہر کے شہر کا افسانہ وہ دل جن کے بیاباں میں

کسی قطرۂ گم گشتہ کے ناگاہ لرزنے کی صدا نے یہ کہا:

''آؤ دکھلائیں تمہیں صبح کے ہونٹوں پہ تبسم کا سراب!''

شہر کے شہر کا افسانہ وہی آرزوئے خستہ کے لنگڑاتے ہوئے پیر

کہ ہیں آج بھی افسانے کی دزدیدہ و ژولیدہ لکیروں پہ رواں

ان اسیروں کی طرح جن کے رگ و ریشہ کی زنجیر کی جھنکار

بھی تھم جائے تو کہہ اٹھیں کہاں

''اب کہاں جائیں گے ہم

جائیں اب تازہ و نادیدہ نگاہوں کے زمستاں میں کہاں؟''

ان اسیروں کی طرح جن کے لیے وقت کی بے صرفہ سلاخیں

نہ کبھی سرد نہ گرم اور نہ کبھی سخت نہ نرم

نہ رہائی کی پذیرائی نہ اسیری ہی کی شرم

شہر کے شہر کا افسانہ وہ روحیں جو سر پل کے سوا

اور کہیں وصل کی جویا ہی نہیں

پل سے جنہیں پار اترنے کی تمنا ہی نہیں

اس کا یارا ہی نہیں!

shahr ke shahr ka afsana wo khush fahm magar sada musafir

ke jinhen ishq ki lalkar ke rahzan ne kaha: ao!

dikhlaen tumhen ek dar basta ke asrar ka khwab

shahr ke shahr ka afsana wo dil jin ke bayaban mein

kisi qatra-e-gum gashta ke nagah larazne ki sada ne ye kaha:

''ao dikhlaen tumhen subh ke honton pe tabassum ka sarab!''

shahr ke shahr ka afsana wahi arzu-e-khasta ke langrate hue pir

ke hain aj bhi afsane ki duzdida-o-zholida lakiron pe rawan

in asiron ki tarah jin ke rag-o-resha ki zanjir ki jhankar

bhi tham jae to kah uthen kahan

''ab kahan jaenge ham

jaen ab taza-o-nadida nigahon ke zamistan mein kahan?''

in asiron ki tarah jin ke liye waqt ki be sarfa salakhen

na kabhi sard na garm aur na kabhi sakht na narm

na rihai ki pazirai na asiri hi ki sharm

shahr ke shahr ka afsana wo ruhen jo sar pal ke siwa

aur kahin wasl ki joya hi nahin

pal se jinhen par utarne ki tamanna hi nahin

us ka yara hi nahin!