کیسے میں بھی بھول جاؤں

کیسے میں بھی بھول جاؤں

زندگی سے اپنا ربط اولیں

ایک دور افتادہ قریے کے قریب

اک جنوں افروز شام

نہر پر شیشم کے اشجار بلند

چاندنی میں ان کی شاخوں کے تلے

تیرے پیمان محبت کا وہ اظہار طویل

روح کا اظہار تھے بوسے مرے

جیسے میری شاعری میرا عمل

روح کا اظہار کیسے بھول جاؤں

کیسے کر ڈالوں میں جسم و روح کو

آج بے آہنگ و نور

تو کہ تھی اس وقت گم نامی کے غاروں میں نہاں

میرے ہونٹوں ہی نے دی تجھ کو نجات

اپنی راہوں پر اٹھا لایا تجھے

زندۂ جاوید کر ڈالا تجھے

جیسے کوئی بت تراش

اپنے بت کو زندگی کے نور سے تاباں کرے

اس کو برگ و بار دینے کے لیے

اپنے جسم و روح کو عریاں کرے

میرے بوسے روح کا اظہار تھے

روح جو اظہار ہی سے زندہ و تابندہ ہے

ہے اسی اظہار سے حاصل مجھے قرب حیات

روح کا اظہار کیسے بھول جاؤں

kaise main bhi bhul jaun

zindagi se apna rabt-e-awwalin

ek dur uftada qariye ke qarib

ik junun afroz sham

nahr par shisham ke ashjar buland

chandni mein un ki shakhon ke tale

tere paiman-e-mohabbat ka wo izhar-e-tawil

ruh ka izhar the bose mire

jaise meri shayari mera amal

ruh ka izhar kaise bhul jaun

kaise kar dalon mein jism-o-ruh ko

aj be ahang-o-nur

tu ke thi is waqt gum nami ke gharon mein nihan

mere honton hi ne di tujh ko najat

apni rahon par utha laya tujhe

zinda-e-jawed kar dala tujhe

jaise koi but tarash

apne but ko zindagi ke nur se taban kare

us ko barg-o-bar dene ke liye

apne jism-o-ruh ko uryan kare

mere bose ruh ka izhar the

ruh jo izhar hi se zinda-o-tabinda hai

hai isi izhar se hasil mujhe qurb-e-hayat

ruh ka izhar kaise bhul jaun