ہم محبت کے خرابوں کے مکیں

ہم محبت کے خرابوں کے مکیں

وقت کے طول المناک کے پروردہ ہیں

ایک تاریک ازل نور ابد سے خالی

ہم جو صدیوں سے چلے ہیں تو سمجھتے ہیں کہ ساحل پایا

اپنی تہذیب کی پاکوبی کا حاصل پایا

ہم محبت کے نہاں خانوں میں بسنے والے

اپنی پامالی کے افسانوں پہ ہنسنے والے

ہم سمجھتے ہیں نشان سر منزل پایا

ہم محبت کے کے خرابوں کے مکیں

کنج ماضی میں ہیں باراں زدہ طائر کی طرح آسودہ

اور کبھی فتنۂ ناگاہ سے ڈر کر چونکیں

تو رہیں سد نگاہ نیند کے بھاری پردے

ہم محبت کے خرابوں کے مکیں!

ایسے تاریک خرابے کہ جہاں

دور سے تیز پلٹ جائیں ضیا کے آہو

ایک بس ایک صدا گونجتی ہو

شب آلام کی ''یاہو! یاہو''

ہم محبت کے خرابوں کے مکیں

ریگ دیروز میں خوابوں کے شجر بوتے رہے

سایہ ناپید تھا سائے کی تمنا کے تلے سوتے رہے

ham mohabbat ke kharabon ke makin

waqt ke tul alamnak ke parwarda hain

ek tarik azal nur-e-abad se khali

ham jo sadiyon se chale hain to samajhte hain ke sahil paya

apni tahzib ki pakobi ka hasil paya

ham mohabbat ke nihan khanon mein basne wale

apni pamali ke afsanon pe hansne wale

ham samajhte hain nishan-e-sar-e-manzil paya

ham mohabbat ke ke kharabon ke makin

kunj-e-mazi mein hain baran zada tair ki tarah asuda

aur kabhi fitna-e-nagah se dar kar chaunken

tu rahen sadd nigah nind ke bhari parde

ham mohabbat ke kharabon ke makin!

aise tarik kharabe ke jahan

dur se tez palat jaen ziya ke ahu

ek bas ek sada gunjti ho

shab alam ki ''yahu! yahu''

ham mohabbat ke kharabon ke makin

reg diroz mein khwabon ke shajar bote rahe

saya napaid tha sae ki tamanna ke tale sote rahe