بخارا سمرقند اک خال ہندو کے بدلے!

بخارا سمرقند اک خال ہندو کے بدلے!

بجا ہے بخارا سمرقند باقی کہاں ہیں؟

بخارا سمرقند نیندوں میں مدہوش

اک نیلگوں خامشی کے حجابوں میں مستور

اور رہروؤں کے لیے ان کے در بند

سوئی ہوئی مہ جبینوں کی پلکوں کے مانند

روسی ''ہمہ اوست'' کے تازیانوں سے معذور

دو مہ جبینیں!

بخارا سمرقند کو بھول جاؤ

اب اپنے درخشندہ شہروں کی

طہران و مشہد کے سقف و در و بام کی فکر کر لو

تم اپنے نئے دور ہوش و عمل کے دل آویز چشموں کو

اپنی نئی آرزوؤں کے ان خوبصورت کنایوں کو

محفوظ کر لو!

ان اونچے درخشندہ شہروں کی

کوتہ فصیلوں کو مضبوط کر لو

ہر اک برج و بارو پر اپنے نگہباں چڑھا دو

گھروں میں ہوا کے سوا

سب صداؤں کی شمعیں بجھا دو!

کہ باہر فصیلوں کے نیچے

کئی دن سے رہزن ہیں خیمہ فگن

تیل کے بوڑھے سودا گروں کے لبادے پہن کر

وہ کل رات یا آج کی رات کی تیرگی میں

چلے آئیں گے بن کے مہماں

تمہارے گھروں میں

وہ دعوت کی شب جام و مینا لڑھائیں گے

ناچیں گے گائیں گے

بے ساختہ قہقہوں ہمہموں سے

وہ گرمائیں گے خون محفل!

مگر پو پھٹے گی

تو پلکوں سے کھودو گے خود اپنے مردوں کی قبریں

بساط ضیافت کی خاکستر سوختہ کے کنارے

بہاؤ گے آنسو!

بہائے ہیں ہم نے بھی آنسو!

گو اب خال ہندو کی ارزش نہیں ہے

عذار جہاں پر وہ رستا ہوا گہرا ناسور

افرنگ کی آز خوں خوار سے بن چکا ہے

بہائے ہیں ہم نے بھی آنسو

ہماری نگاہوں نے دیکھے ہیں

سیال سایوں کے مانند گھلتے ہوئے شہر

گرتے ہوئے بام و در

اور مینار و گنبد

مگر وقت مینار ہے

اور دشمن اب اس کی خمیدہ کمر سے گزرتا ہوا

اس کے نچلے افق پر لڑھکتا چلا جا رہا ہے

ہمارے برہنہ و کاہیدہ جسموں نے

وہ قید و بند اور وہ تازیانے سہے ہیں

کہ ان سے ہمارا ستم گر

خود اپنے الاؤ میں جلنے لگا ہے!

مرے ہاتھ میں ہاتھ دے دو!

مرے ہاتھ میں ہاتھ دے دو!

کہ دیکھی ہیں میں نے

ہمالہ و الوند کی چوٹیوں پر شعاعیں

انہیں سے وہ خورشید پھوٹے گا آخر

بخارا سمرقند بھی سالہا سال سے

جس کی حسرت کے دریوزہ گر ہیں!

bukhara samarqand ik khal hindu ke badle!

baja hai bukhara samarqand baqi kahan hain?

bukhara samarqand nindon mein madhosh

ik nilgun khamushi ke hijabon mein mastur

aur rahrauon ke liye un ke dar band

soi hui mah jabinon ki palkon ke manind

rusi ''hama osat'' ke taziyanon se maazur

do mah jabinen!

bukhara samarqand ko bhul jao

ab apne darakhshinda shahron ki

tohran-o-mashhad ke saqaf-o-dar-o-bam ki fikr kar lo

tum apne nae daur hosh-o-amal ke dil awez chashmon ko

apni nai arzuon ke un khubsurat kinayon ko

mahfuz kar lo!

un unche darakhshinda shahron ki

kotah fasilon ko mazbut kar lo

har ik biraj-o-baru par apne nigahban charha do

gharon mein hawa ke siwa

sab sadaon ki shamen bujha do!

ke bahar fasilon ke niche

kai din se rahzan hain khema fagan

tel ke burhe sauda garon ke labade pahan kar

wo kal rat ya aj ki rat ki tirgi mein

chale aenge ban ke mehman

tumhare gharon mein

wo daawat ki shab jam-o-mina lurhaenge

nachenge gaenge

be sakhta qahqahon hamhamon se

wo garmaenge khun-e-mahfil!

magar pau phategi

tu palkon se khodoge khud apne mardon ki qabren

bisat-e-ziyafat ki khakistar sokhta ke kinare

bahaoge ansu!

bahae hain ham ne bhi ansu!

go ab khal hindu ki arzish nahin hai

izar jahan par wo rasta hua gahra nasur

afrang ki az khun khwar se ban chuka hai

bahae hain ham ne bhi ansu

hamari nigahon ne dekhe hain

sayyal sayon ke manind ghulte hue shahr

girte hue bam-o-dar

aur minar-o-gumbad

magar waqt minar hai

aur dushman ab us ki khamida kamar se guzarta hua

us ke nichle ufuq par lurhakta chala ja raha hai

hamare barahna-o-kahida jismon ne

wo qaid-o-band aur wo taziyane sahe hain

ke un se hamara sitam gar

khud apne alao mein jalne laga hai!

mire hath mein hath de do!

mire hath mein hath de do!

ke dekhi hain main ne

himala-o-alwand ki chotiyon par shuaen

unhen se wo khurshid phutega akhir

bukhara samarqand bhi salha-e-sal se

jis ki hasrat ke daryuza gar hain!