آج دروازے کھلے رہنے دو
Noon Meem Rashid (1910–1975)آج دروازے کھلے رہنے دو
یاد کی آگ دہک اٹھی ہے
شاید اس رات ہمارے شہدا آ جائیں
آج دروازے کھلے رہنے دو
جانتے ہو کبھی تنہا نہیں چلتے ہیں شہید؟
میں نے دریا کے کنارے جو پرے دیکھے ہیں
جو چراغوں کی لویں دیکھیں ہیں
وہ لویں بولتی تھیں زندہ زبانوں کی طرح
میں نے سرحد پہ وہ نغمات سنے ہیں کہ جنہیں
کون گائے گا شہیدوں کے سوا؟
میں نے ہونٹوں پہ تبسم کی نئی تیز چمک دیکھی ہے
نور جس کا تھا حلاوت سے شرابور
اذانوں کی طرح!
ابھی سرحد سے میں لوٹا ہوں ابھی،
میں ابھی ہانپ رہا ہوں مجھے دم لینے دو
راز وہ ان کی نگاہوں میں نظر آیا ہے
جو ہمہ گیر تھا نادیدہ زمانوں کی طرح!
یاد کی آگ دہک اٹھی ہے
سب تمناؤں کے شہروں میں دہک اٹھی ہے
آج دروازے کھلے رہنے دو
شاید اس رات ہمارے شہدا آ جائیں!
وقت کے پاؤں الجھ جاتے ہیں آواز کی زنجیروں سے
ان کی جھنکار سے خود وقت جھنک اٹھتا ہے
نغمہ مرتا ہے کبھی، نالہ بھی مرتا ہے کبھی؟
سنسناہٹ کبھی جاتی ہے محبت کے بجھے تیروں سے؟
میں نے دریا کے کنارے انہیں یوں دیکھا ہے
میں نے جس آن میں دیکھا ہے انہیں
شاید اس رات،
اس شام ہی،
دروازوں پہ دستک دیں گے!
شہدا اتنے سبک پا ہیں کہ جب آئیں گے
نہ کسی سوئے پرندے کو خبر تک ہوگی
نہ درختوں سے کسی شاخ کے گرنے کی صدا گونجے گی
پھڑپھڑاہٹ کسی زنبور کی بھی کم ہی سنائی دے گی
آج دروازے کھلے رہنے دو!
ابھی سرحد سے میں لوٹا ہوں ابھی
پار جو گزرے گی اس کا ہمیں غم ہی کیوں ہو؟
پار کیا گزرے گی معلوم نہیں
ایک شب جس میں
پریشانیٔ آلام سے روحوں پہ گرانی طاری
روحیں سنسان یتیم
ان پہ ہمیشہ کی جفائیں بھاری
بوئے کافور اگر بستے گھروں سے جاری
بے پناہ خوف میں رویائے شکستہ کی فغاں اٹھے گی
بجھتی شمعوں کا دھواں اٹھے گا
پار جو گزرے گی معلوم نہیں
اپنے دروازے کھلے رہنے دو
aj darwaze khule rahne do
yad ki ag dahak uthi hai
shayad is rat hamare shuhada a jaen
aj darwaze khule rahne do
jante ho kabhi tanha nahin chalte hain shahid?
main ne dariya ke kinare jo pare dekhe hain
jo charaghon ki lawen dekhen hain
wo lawen bolti thin zinda zabanon ki tarah
main ne sarhad pe wo naghmat sune hain ke jinhen
kaun gaega shahidon ke siwa?
main ne honton pe tabassum ki nai tez chamak dekhi hai
nur jis ka tha halawat se sharabur
azanon ki tarah!
abhi sarhad se main lauta hun abhi,
main abhi hanp raha hun mujhe dam lene do
raz wo un ki nigahon mein nazar aya hai
jo hama gir tha nadida zamanon ki tarah!
yad ki ag dahak uthi hai
sab tamannaon ke shahron mein dahak uthi hai
aj darwaze khule rahne do
shayad is rat hamare shuhada a jaen!
waqt ke paon ulajh jate hain awaz ki zanjiron se
un ki jhankar se khud waqt jhanak uthta hai
naghma marta hai kabhi, nala bhi marta hai kabhi?
sansanahat kabhi jati hai mohabbat ke bujhe tiron se?
main ne dariya ke kinare unhen yun dekha hai
main ne jis an mein dekha hai unhen
shayad is rat,
us sham hi,
darwazon pe dastak denge!
shuhada itne subuk pa hain ke jab aenge
na kisi su-e-parinde ko khabar tak hogi
na darakhton se kisi shakh ke girne ki sada gunjegi
pharpharahat kisi zambur ki bhi kam hi sunai degi
aj darwaze khule rahne do!
abhi sarhad se main lauta hun abhi
par jo guzregi us ka hamen gham hi kyun ho?
par kya guzregi maalum nahin
ek shab jis mein
pareshani-e-alam se ruhon pe girani tari
ruhen sunsan yatim
un pe hamesha ki jafaen bhari
bu-e-kafur agar baste gharon se jari
be panah khauf mein roya-e-shikasta ki fughan uthegi
bujhti shamon ka dhuan uthega
par jo guzregi maalum nahin
apne darwaze khule rahne do