گناہ کے تند و تیز شعلوں سے روح میری بھڑک رہی تھی

گناہ کے تند و تیز شعلوں سے روح میری بھڑک رہی تھی

ہوس کی سنسان وادیوں میں مری جوانی بھٹک رہی تھی

مری جوانی کے دن گزرتے تھے وحشت آلود عشرتوں میں

مری جوانی کے مے کدوں میں گناہ کی مے چھلک رہی تھی

مرے حریم گناہ میں عشق دیوتا کا گزر نہیں تھا

مرے فریب وفا کے صحرا میں حور عصمت بھٹک رہی تھی

مجھے خس ناتواں کے مانند ذوق عصیاں بہا رہا تھا

گناہ کی موج فتنہ ساماں اٹھا اٹھا کر پٹک رہی تھی

شباب کے اولیں دنوں میں تباہ و افسردہ ہو چکے تھے

مرے گلستاں کے پھول جن سے فضائے طفلی مہک رہی تھی

غرض جوانی میں اہرمن کے طرب کا سامان بن گیا میں

گنہ کی آلائشوں میں لتھڑا ہوا اک انسان بن گیا میں

محبت

اور اب کہ تیری محبت سرمدی کا بادہ گسار ہوں میں

ہوس پرستی کی لذت بے ثبات سے شرمسار ہوں میں

مری بہیمانہ خواہشوں نے فرار کی راہ لی ہے دل سے

اور ان کے بدلے اک آرزوئے سلیم سے ہمکنار ہوں میں

دلیل راہ وفا بنی ہیں ضیائے الفت کی پاک کرنیں

پھر اپنے فردوس گم شدہ کی تلاش میں رہ سپار ہوں میں

ہوا ہوں بے دار کانپ کر اک مہیب خوابوں کے سلسلے سے

اور اب نمود سحر کی خاطر ستم کش انتظار ہوں میں

بہار تقدیس جاوداں کی مجھے پھر اک بار آرزو ہے

پھر ایک پاکیزہ زندگی کے لیے بہت بے قرار ہوں میں

مجھے محبت نے معصیت کے جہنموں سے بچا لیا ہے

مجھے جوانی کی تیرہ و تار پستیوں سے اٹھا لیا ہے

gunah ke tund-o-tez sholon se ruh meri bharak rahi thi

hawas ki sunsan wadiyon mein miri jawani bhatak rahi thi

miri jawani ke din guzarte the wahshat alud ishraton mein

miri jawani ke mai kadon mein gunah ki mai chhalak rahi thi

mire harim-e-gunah mein ishq dewta ka guzar nahin tha

mire fareb-e-wafa ke sahra mein hur-e-ismat bhatak rahi thi

mujhe khas-e-natawan ke manind-e-zauq-e-isyan baha raha tha

gunah ki mauj fitna saman utha utha kar patak rahi thi

shabab ke awwalin dinon mein tabah-o-afsurda ho chuke the

mire gulistan ke phul jin se faza-e-tifli mahak rahi thi

gharaz jawani mein ahriman ke tarab ka saman ban gaya main

gunah ki alaishon mein lithra hua ik insan ban gaya main

mohabbat

aur ab ke teri mohabbat sarmadi ka bada gusar hun main

hawas parasti ki lazzat-e-be sabat se sharmsar hun main

miri bahemana khwahishon ne farar ki rah li hai dil se

aur un ke badle ik arzu-e-salim se hamkanar hun main

dalil-e-rah-e-wafa bani hain ziya-e-ulfat ki pak kirnen

phir apne firdaus-e-gum shuda ki talash mein rah sipar hun main

hua hun be dar kanp kar ik muhib khwabon ke silsile se

aur ab numud-e-sahar ki khatir sitam kash-e-intizar hun main

bahar taqdis-e-jawedan ki mujhe phir ik bar-e-arzu hai

phir ek pakiza zindagi ke liye bahut be qarar hun main

mujhe mohabbat ne maasiyat ke jahannamon se bacha liya hai

mujhe jawani ki tira-o-tar pastiyon se utha liya hai