لب بیاباں، بوسے بے جاں

لب بیاباں، بوسے بے جاں

کون سی الجھن کو سلجھاتے ہیں ہم؟

جسم کی یہ کار گاہیں

جن کا ہیزم آپ بن جاتے ہیں ہم!

نیم شب اور شہر خواب آلودہ، ہمسائے

کہ جیسے دزد شب گرداں کوئی!

شام سے تھے حسرتوں کے بندۂ بے دام ہم

پی رہے تھے جام پر ہر جام ہم

یہ سمجھ کر جرعۂ پنہاں کوئی

شاید آخر ابتدائے راز کا ایما بنے!

مطلب آساں حرف بے معنی

تبسم کے حسابی زاویے

متن کے سب حاشیے

جن سے عیش خام کے نقش ریا بنتے رہے!

اور آخر بعد جسموں میں سر مو بھی نہ تھا

جب دلوں کے درمیاں حائل تھے سنگیں فاصلے

قرب چشم و گوش سے ہم کون سی الجھن کو سلجھاتے رہے!

کون سی الجھن کو سلجھاتے ہیں ہم؟

شام کو جب اپنی غم گاہوں سے دزدانہ نکل آتے ہیں ہم؟

یا زوال عمر کا دیو سبک پا رو بہ رو

یا انا کے دست و پا کو وسعتوں کی آرزو

کون سی الجھن کو سلجھاتے ہیں ہم؟

lab bayaban, bose be jan

kaun si uljhan ko sulajhite hain ham?

jism ki ye kar gahen

jin ka hezam ap ban jate hain ham!

nim shab aur shahr khwab aluda, hamsae

ke jaise duzd-e-shab gardan koi!

sham se the hasraton ke banda-e-be dam ham

pi rahe the jam par har jam ham

ye samajh kar jura-e-pinhan koi

shayad akhir ibtida-e-raz ka ima bane!

matlab asan harf-e-be maani

tabassum ke hisabi zawiye

matn ke sab hashiye

jin se aish kham ke naqsh riya bante rahe!

aur akhir baad jismon mein sar-e-mu bhi na tha

jab dilon ke darmiyan hail the sangin fasle

qurb-e-chashm-o-gosh se ham kaun si uljhan ko sulajhite rahe!

kaun si uljhan ko sulajhite hain ham?

sham ko jab apni gham gahon se duzdana nikal ate hain ham?

ya zawal umr ka dew subuk pa ru ba ro

ya ana ke dast-o-pa ko wusaton ki arzu

kaun si uljhan ko sulajhite hain ham?