Arooz is now on the App Store, for iPhone and iPad. Download →

All poetry

اتنی پی جاؤ

Nida Fazli (1938–2016)

اتنی پی جاؤ

کہ کمرے کی سیہ خاموشی

اس سے پہلے کہ کوئی بات کرے

تیز نوکیلے سوالات کرے

اتنی پی جاؤ کہ دیواروں کے بے رنگ نشان

اس سے پہلے کہ

کوئی روپ بھریں

ماں بہن بھائی کو تصویر کریں

ملک تقسیم کریں

اس سے پہلے کہ اٹھیں دیواریں

خون سے مانگ بھریں تلواریں

یوں گرو ٹوٹ کے بستر پہ اندھیرا ہو جائے

جب کھلے آنکھ سویرا ہو جائے

اتنی پی جاؤ!