نہ جانے کون وہ بہروپیا ہے

نہ جانے کون وہ بہروپیا ہے

جو ہر شب

مری تھکی ہوئی پلکوں کی سبز چھاؤں میں

طرح طرح کے کرشمے دکھایا کرتا ہے

لپکتی سرخ لپٹ

جھومتی ہوئی ڈالی

چمکتے تال کے پانی میں ڈوبتا پتھر

ابھرتے پھیلتے گھیروں میں تیرتے خنجر

اچھلتی گیند ربڑ کی سدھے ہوئے دو ہاتھ

سلگتے کھیت کی مٹی پہ ٹوٹتی برسات

عجیب خواب ہیں یہ

بنا وضو کئے سوئی نہیں کبھی میں تو

میں سوچتی ہوں

کسی روز اپنی بھابی کے

چمکتے پاؤں کی پازیب توڑ کر رکھ دوں

بڑی شریر ہے ہر وقت شور کرتی ہیں

کسی طرح سہی بے خواب نیند تو آئے

گھڑی گھڑی کی مصیبت سے جان چھٹ جائے

na jane kaun wo bahropiya hai

jo har shab

miri thaki hui palkon ki sabz chhaon mein

tarah tarah ke karishme dikhaya karta hai

lapakti surkh lipat

jhumti hui dali

chamakte tal ke pani mein dubta patthar

ubharte phailte gheron mein tairte khanjar

uchhalti gend rabar ki sidhe hue do hath

sulagte khet ki mitti pe tutti barsat

ajib khwab hain ye

bana wuzu kiye soi nahin kabhi main to

main sochti hun

kisi roz apni bhabi ke

chamakte paon ki pazeb tor kar rakh dun

bari sharir hai har waqt shor karti hain

kisi tarah sahi be khwab nind to ae

ghari ghari ki musibat se jan chhut jae