میرے جسم میں زہر ہے تیرا

میرے جسم میں زہر ہے تیرا

میرا دل ہے تیرا گھر

تو موجود ہے ساتھ ہمیشہ

خوف سا بن کر شام و سحر

تیرا اثر ہے میرے لہو پر

جیسے چاند سمندر پر

اتنی زرد ہے رنگت تیری

جم جاتی ہے اس پہ نظر

تو ہے سزا مرے ہونے کی

یا ہے میرا زاد سفر

کرے گا تو بیمار مجھے یا

بنے گا نا معلوم کا ڈر

رہے گا دائم گہری تہ میں

جیسے اندھیرے میں کوئی در

گم کر دے گا راہ میں مجھ کو

یا دے گا منزل کی خبر

تو ہے میرا دوست کہ دشمن

یہ تو بتا مجھ کو اے زر

mere jism mein zahr hai tera

mera dil hai tera ghar

tu maujud hai sath hamesha

khauf sa ban kar sham-o-sahar

tera asar hai mere lahu par

jaise chand samundar par

itni zard hai rangat teri

jam jati hai us pe nazar

tu hai saza mire hone ki

ya hai mera zad-e-safar

karega to bimar mujhe ya

banega na maalum ka dar

rahega daim gahri tah mein

jaise andhere mein koi dar

gum kar dega rah mein mujh ko

ya dega manzil ki khabar

tu hai mera dost ke dushman

ye to bata mujh ko ai zar