عمر کی ڈھلتی ہوئی دوپہر میں

عمر کی ڈھلتی ہوئی دوپہر میں

ٹھنڈی ہوا کے جھونکے کا احساس بھی

آدمی کو تازہ دم کر دیتا ہے

اور اگر سچ مچ خنک ہوائیں

تھکن نصیب جسم سے کھیلنے لگیں

تو شب کی تاریکی خضاب جیسی دکھائی دیتی ہے

آس پاس گردش کرتا ہوا سناٹا

آرزوؤں کی گہما گہمی سے گونجنے لگتا ہے

خواب تعبیروں کی تلاش میں بھٹکنے لگتے ہیں

بدن کی اکتاہٹیں چوپال کے شور شرابے میں ڈوب جاتی ہیں

ڈھلتے ہوئے سورج کی لالی سے سہاگ جوڑے کی خوشبو

آنے لگتی ہے

لیکن خوابیدہ آرزوؤں کی شاہراہ سے گزرتے ہوئے

لوگ

اپنی منزل کا پتا بھول جاتے ہیں

اسی پتا بھولنے کو سماج

دھرم اور مذہب کی آڑ لے کر

ایسی بے ہودہ گالیاں دیتا ہے

جو طوائفوں کے محلوں میں بھی نہیں

سنائی دیتیں

umr ki dhalti hui dopahar mein

thandi hawa ke jhonke ka ehsas bhi

admi ko taza dam kar deta hai

aur agar sach much khunuk hawaen

thakan nasib jism se khelne lagen

tu shab ki tariki khizab jaisi dikhai deti hai

as pas gardish karta hua sannata

arzuon ki gahma gahme se gunjne lagta hai

khwab taabiron ki talash mein bhatakne lagte hain

badan ki uktahaten chaupal ke shor sharube mein dub jati hain

dhalte hue suraj ki lali se suhag jore ki khushbu

ane lagti hai

lekin khwabida arzuon ki shahrah se guzarte hue

log

apni manzil ka pata bhul jate hain

isi pata bhulne ko samaj

dharm aur mazhab ki ar le kar

aisi be hoda galiyan deta hai

jo tawaifion ke mahlon mein bhi nahin

sunai detin