چہرے تمام دھندلے نظر آ رہے ہیں کیوں

چہرے تمام دھندلے نظر آ رہے ہیں کیوں

کیوں خواب رتجگوں کی حویلی میں دب گئے

ہے کل کی بات انگلی پکڑ کر کسی کی میں

میلے میں گھومتا تھا کھلونوں کے واسطے

جتنے ورق لکھے تھے مری زندگی نے سب

آندھی کے ایک جھونکے میں بکھرے ہوئے ہیں سب

میں چاہتا ہوں پھر سے سمیٹوں یہ زندگی

بچے تمام پاس کھڑے ہیں بجھے بجھے

شوخی نہ جانے کیا ہوئی رنگت کہاں گئی

جیسے کتاب چھوڑ کے جاتے ہوئے ورق

جیسے کہ بھولنے لگے بچہ کوئی سبق

جیسے جبیں کو چھونے لگے موت کا عرق

جیسے چراغ نیند کی آغوش کی طرف

بڑھنے لگے اندھیرے کی زلفیں بکھیر کر

بھولے ہوئے ہیں ہونٹ ہنسی کا پتہ تلک

دروازہ دل کا بند ہوا چاہتا ہے اب

کیا سوچنا کہ پھول سے بچوں کا ساتھ ہے

اب میں ہوں اسپتال کا بستر ہے رات ہے

chehre tamam dhundle nazar a rahe hain kyun

kyun khwab ratjagon ki haweli mein dab gae

hai kal ki bat ungli pakar kar kisi ki main

mele mein ghumta tha khilaunon ke waste

jitne waraq likhe the miri zindagi ne sab

andhi ke ek jhonke mein bikhre hue hain sab

main chahta hun phir se sametun ye zindagi

bachche tamam pas khare hain bujhe bujhe

shokhi na jane kya hui rangat kahan gai

jaise kitab chhor ke jate hue waraq

jaise ke bhulne lage bachcha koi sabaq

jaise jabin ko chhune lage maut ka araq

jaise charagh nind ki aghosh ki taraf

barhne lage andhere ki zulfen bikher kar

bhule hue hain hont hansi ka pata talak

darwaza dil ka band hua chahta hai ab

kya sochna ke phul se bachchon ka sath hai

ab main hun aspatal ka bistar hai rat hai