مت مری پوشاک پر دھبہ لگا

مت مری پوشاک پر دھبہ لگا

رنگ بھرنا ہے تو پھر اچھا لگا

تیر لے کر بے بسی کے ہاتھ سے

گھاؤ اپنے ہاتھ سے گہرا لگا

دوستوں کو جشن کی دے کر نوید

زخم اب سیدھا نہیں ترچھا لگا

سچ نظر آ جائے تو بخیہ ادھیڑ

جھوٹ کو تشہیر کا ٹانکا لگا

آتا جاتا آدمی الجھا رہے

شہر میں تو آئنہ میلا لگا

جس کے آگے ہو زمانہ سرنگوں

اس کے پیچھے وہم کا چیتا لگا

سر کسی کا دار پر لٹکا عدیمؔ

دور سے دیکھا تو وہ جھنڈا لگا

mat miri poshak par dhabba laga

rang bharna hai to phir achchha laga

tir le kar be basi ke hath se

ghao apne hath se gahra laga

doston ko jashn ki de kar nawed

zakhm ab sidha nahin tirchha laga

sach nazar a jae to bakhiya adher

jhut ko tashhir ka tanka laga

ata jata admi uljha rahe

shahr mein to aina maila laga

jis ke age ho zamana sarnigun

us ke pichhe wahm ka chita laga

sar kisi ka dar par latka adim

dur se dekha to wo jhanda laga