آپ نے جو گرا دئے آنسو

آپ نے جو گرا دئے آنسو

ہم نے موتی بنا دئے آنسو

ایسے رویا بہار میں کوئی

شاخ پر بھی اگا دئے آنسو

نام اس کا لبوں پہ آتے ہی

گال پر مسکرا دئے آنسو

تم بھی کیسے عجیب آدمی ہو

داؤ پر پھر لگا دئے آنسو

میں نے پوچھا کہ آنکھیں روتی ہیں

اس نے اک دم بہا دئے آنسو

خواب جتنے بھی دیکھے آنکھوں نے

وقت نے وہ بنا دئے آنسو

کہیں ہنس کر عدیمؔ پی آئے

کہیں رو کر اڑا دئے آنسو

ap ne jo gira diye ansu

ham ne moti bana diye ansu

aise roya bahar mein koi

shakh par bhi uga diye ansu

nam us ka labon pe ate hi

gal par muskura diye ansu

tum bhi kaise ajib admi ho

dao par phir laga diye ansu

main ne puchha ke ankhen roti hain

us ne ik dam baha diye ansu

khwab jitne bhi dekhe ankhon ne

waqt ne wo bana diye ansu

kahin hans kar adim pi ae

kahin ro kar ura diye ansu