یہ کتابوں کی صف بہ صف جلدیں

یہ کتابوں کی صف بہ صف جلدیں

کاغذوں کا فضول استعمال

روشنائی کا شاندار اسراف

سیدھے سیدھے سے کچھ سیہ دھبے

جن کی توجیہہ آج تک نہ ہوئی

چند خوش ذوق کم نصیبوں نے

بسر اوقات کے لیے شاید

یہ لکیریں بکھیر ڈالی ہیں

کتنی ہی بے قصور نسلوں نے

ان کو پڑھنے کے جرم میں تا عمر

لے کے کشکول علم و حکمت و فن

کو بہ کو جاں کی بھیک مانگی ہے

آہ یہ وقت کا عذاب الیم

وقت خلاق بے شعور قدیم

ساری تعریفیں ان اندھیروں کی

جن میں پرتو نہ کوئی پرچھائیں

آہ یہ زندگی کی تنہائی

سوچنا اور سوچتے رہنا

چند معصوم پاگلوں کی سزا

آج میں نے بھی سوچ رکھا ہے

وقت سے انتقام لینے کو

یوں ہی تا شام سادے کاغذ پر

ٹیڑھے ٹیڑھے خطوط کھینچے جائیں

ye kitabon ki saf ba saf jalden

kaghazon ka fuzul istemal

raushnai ka shandar israf

sidhe sidhe se kuchh siyah dhabbe

jin ki taujiha aj tak na hui

chand khush zauq kam nasibon ne

basar auqat ke liye shayad

ye lakiren bikher dali hain

kitni hi be qusur naslon ne

un ko parhne ke jurm mein ta umar

le ke kashkol ilm-o-hikmat-o-fan

ku ba ku jan ki bhik mangi hai

ah ye waqt ka azab-e-alim

waqt khallaq be shuur qadim

sari taarifen in andheron ki

jin mein partau na koi parchhain

ah ye zindagi ki tanhai

sochna aur sochte rahna

chand maasum pagalon ki saza

aj main ne bhi soch rakha hai

waqt se intiqam lene ko

yun hi ta sham sade kaghaz par

terhe terhe khutut khinche jaen