وقت کو آتے نہ جاتے نہ گزرتے دیکھا

وقت کو آتے نہ جاتے نہ گزرتے دیکھا

نہ اترتے ہوئے دیکھا کبھی الہام کی صورت

جمع ہوتے ہوئے اک جگہ مگر دیکھا ہے

شاید آیا تھا وہ خوابوں سے دبے پاؤں ہی

اور جب آیا خیالوں کو بھی احساس نہ تھا

آنکھ کا رنگ طلوع ہوتے ہوئے دیکھا جس دن

میں نے چوما تھا مگر وقت کو پہچانا نہ تھا

چند تتلائے ہوئے بولوں میں آہٹ بھی سنی

دودھ کا دانت گرا تھا تو وہاں بھی دیکھا

بوسکی بیٹی مری چکنی سی ریشم کی ڈلی

لپٹی لپٹائی ہوئی ریشمی تانگوں میں پڑی تھی

مجھ کو احساس نہیں تھا کہ وہاں وقت پڑا ہے

پالنا کھول کے جب میں نے اتارا تھا اسے بستر پر

لوری کے بولوں سے اک بار چھوا تھا اس کو

بڑھتے ناخونوں میں ہر بار تراشا بھی تھا

چوڑیاں چڑھتی اترتی تھیں کلائی پہ مسلسل

اور ہاتھوں سے اترتی کبھی چڑھتی تھیں کتابیں

مجھ کو معلوم نہیں تھا کہ وہاں وقت لکھا ہے

وقت کو آتے نہ جاتے نہ گزرتے دیکھا

جمع ہوتے ہوئے دیکھا مگر اس کو میں نے

اس برس بوسکی اٹھارہ برس کی ہوگی

waqt ko ate na jate na guzarte dekha

na utarte hue dekha kabhi ilham ki surat

jama hote hue ik jagah magar dekha hai

shayad aya tha wo khwabon se dabe paon hi

aur jab aya khayalon ko bhi ehsas na tha

ankh ka rang tulu hote hue dekha jis din

main ne chuma tha magar waqt ko pahchana na tha

chand tutlae hue bolon mein ahat bhi suni

dudh ka dant gira tha to wahan bhi dekha

busaki beti miri chukni si resham ki dali

lipti laptai hui reshmi tangon mein pari thi

mujh ko ehsas nahin tha ke wahan waqt para hai

palna khol ke jab main ne utara tha use bistar par

lori ke bolon se ik bar chhua tha us ko

barhte nakhunon mein har bar tarasha bhi tha

chauriyan charhti utarti thin kalai pe musalsal

aur hathon se utarti kabhi charhti thin kitaben

mujh ko maalum nahin tha ke wahan waqt likha hai

waqt ko ate na jate na guzarte dekha

jama hote hue dekha magar us ko main ne

is baras busaki atthara baras ki hogi