تمہارے روز و شب سے اب کوئی نسبت نہیں لیکن

تمہارے روز و شب سے اب کوئی نسبت نہیں لیکن

تمہارا عکس ہر لمحے کے آئینے میں ملتا ہے

بچھڑ کر تم سے کتنی شامیں ہنس ہنس کر گزاری ہیں

سجائے کیسے کیسے گیسوؤں میں پھول اشکوں کے

لٹائی آبروئے سجدہ کس کس آستانے پر

پئے ہیں کس قدر چھلکے ہوئے تلخاب آنکھوں کے

ملا چہرے پہ دن کے کس طرح غازہ تبسم کا

سیے ہیں زخم کس کس طرح سے بے خواب راتوں کے

تمہارے روز و شب سے اب کوئی نسبت نہیں لیکن

تمہاری شکل کا ہر ایک چہرے پر ہوا دھوکا

صدا جب بھی سنی کوئی تمہارا نام یاد آیا

نگاہ لطف کی چھاؤں نے دے دی ہو اماں جیسے

کسی کو حال پر اپنے کبھی جب مہرباں پایا

تمہارا نام لے کر پاس آئے درد کے سائے

تمہارا روپ پا کر دل نے کس کس کو نہ اپنایا

تمہارے روز و شب سے اب کوئی نسبت نہیں لیکن

تمہارا عکس ہر لمحے کے آئینے میں ملتا ہے

tumhare roz-o-shab se ab koi nisbat nahin lekin

tumhara aks har lamhe ke aine mein milta hai

bichhar kar tum se kitni shamen hans hans kar guzari hain

sajae kaise kaise gesuon mein phul ashkon ke

lutai abru-e-sajda kis kis astane par

piye hain kis qadar chhalke hue talkhab ankhon ke

mila chehre pe din ke kis tarah ghaza tabassum ka

saye hain zakhm kis kis tarah se be khwab raton ke

tumhare roz-o-shab se ab koi nisbat nahin lekin

tumhari shakl ka har ek chehre par hua dhoka

sada jab bhi suni koi tumhara nam yad aya

nigah-e-lutf ki chhaon ne de di ho aman jaise

kisi ko hal par apne kabhi jab mehrban paya

tumhara nam le kar pas ae dard ke sae

tumhara rup pa kar dil ne kis kis ko na apnaya

tumhare roz-o-shab se ab koi nisbat nahin lekin

tumhara aks har lamhe ke aine mein milta hai