عجب یقین سا اس شخص کے گمان میں تھا

عجب یقین سا اس شخص کے گمان میں تھا

وہ بات کرتے ہوئے بھی نئی اڑان میں تھا

ہوا بھری ہوئی پھرتی تھی اب کے ساحل پر

کچھ ایسا حوصلہ کشتی کے بادبان میں تھا

ہمارے بھیگے ہوئے پر نہیں کھلے ورنہ

ہمیں بلاتا ستارہ تو آسمان میں تھا

اتر گیا ہے رگ و پے میں ذائقہ اس کا

عجیب شہد سا کل رات اس زبان میں تھا

کھلی جو آنکھ تو تابشؔ کمال یہ دیکھا

وہ میری روح میں تھا اور میں مکان میں تھا

ajab yaqin sa us shakhs ke guman mein tha

wo bat karte hue bhi nai uran mein tha

hawa bhari hui phirti thi ab ke sahil par

kuchh aisa hausla kashti ke badban mein tha

hamare bhige hue par nahin khule warna

hamen bulata sitara to asman mein tha

utar gaya hai rag-o-pe mein zaiqa us ka

ajib shahd sa kal rat is zaban mein tha

khuli jo ankh to tabish kamal ye dekha

wo meri ruh mein tha aur main makan mein tha