عجیب صبح تھی دیوار و در کچھ اور سے تھے

عجیب صبح تھی دیوار و در کچھ اور سے تھے

نگاہ دیکھ رہی تھی کہ گھر کچھ اور سے تھے

وہ آشیانے نہیں تھے جہاں پہ چڑیاں تھیں

شجر کچھ اور سے ان پر ثمر کچھ اور سے تھے

تمام کشتیاں منجدھار میں گھری ہوئی تھیں

ہر ایک لہر میں بنتے بھنور کچھ اور سے تھے

بہت بدل گیا میدان جنگ کا نقشہ

وہ دھڑ کچھ اور سے تھے ان پہ سر کچھ اور سے تھے

مرے حلیف مرے ساتھ تھے لڑائی میں

ہر ایک شخص کے تیور مگر کچھ اور سے تھے

کئی پڑاؤ تھے منزل کی راہ میں تابشؔ

مرے نصیب میں لیکن سفر کچھ اور سے تھے

ajib subh thi diwar-o-dar kuchh aur se the

nigah dekh rahi thi ke ghar kuchh aur se the

wo ashiyane nahin the jahan pe chiriyan thin

shajar kuchh aur se un par samar kuchh aur se the

tamam kashtiyan manjdhar mein ghiri hui thin

har ek lahr mein bante bhanwar kuchh aur se the

bahut badal gaya maidan-e-jang ka naqsha

wo dhar kuchh aur se the un pe sar kuchh aur se the

mire halif mire sath the larai mein

har ek shakhs ke tewar magar kuchh aur se the

kai parao the manzil ki rah mein tabish

mire nasib mein lekin safar kuchh aur se the