مناؤ جشن محبت کہ خوں کی بو نہ رہی

مناؤ جشن محبت کہ خوں کی بو نہ رہی

برس کے کھل گئے بارود کے سیہ بادل

بجھی بجھی سی ہے جنگوں کی آخری بجلی

مہک رہی ہے گلابوں سے تاشقند کی شام

جگاؤ گیسوئے جاناں کی عنبریں راتیں

جلاؤ ساعد سیمیں کی شمع کافوری

طویل بوسوں کے گل رنگ جام چھلکاؤ

یہ سرخ جام ہے خوبان تاشقند کے نام

یہ سبز جام ہے لاہور کے حسینوں کا

سفید جام ہے دلی کے دلبروں کے لیے

گھلا ہے جس میں محبت کے آفتاب کا رنگ

کھلی ہوئی ہے افق پر شفق تبسم کی

نسیم شوق چلی مہرباں تکلم کی

لبوں کی شعلہ فشانی ہے شبنم افشانی

اسی میں صبح تمنا نہا کے نکھرے گی

کسی کی زلف نہ اب شام غم میں بکھرے گی

جوان خوف کی وادی سے اب نہ گزریں گے

جیالے موت کے ساحل پہ اب نہ اتریں گے

بھری نہ جائے گی اب خاک و خوں سے مانگ کبھی

ملے گی ماں کو نہ مرگ پسر کی خوش خبری

کوئی نہ دے گا یتیموں کو اب مبارک باد

کھلیں گے پھول بہت سرحد تمنا پر

خبر نہ ہوگی یہ نرگس ہے کس کی آنکھوں کی

یہ گل ہے کس کی جبیں کس کا لب ہے یہ لالہ

یہ شاخ کس کے جواں بازوؤں کی انگڑائی

بس اتنا ہوگا یہ دھرتی ہے شہسواروں کی

جہان حسن کے گمنام تاجداروں کی

یہ سرزمیں ہے محبت کے خواستگاروں کی

جو گل پہ مرتے تھے شبنم سے پیار کرتے تھے

خدا کرے کہ یہ شبنم یوں ہی برستی رہے

زمیں ہمیشہ لہو کے لیے ترستی رہے

manao jashn-e-mohabbat ke khun ki bu na rahi

baras ke khul gae barud ke siyah badal

bujhi bujhi si hai jangon ki akhiri bijli

mahak rahi hai gulabon se tashqand ki sham

jagao gesu-e-janan ki ambarin raten

jalao said-e-simin ki sham-e-kafuri

tawil boson ke gul rang jam chhalkao

ye surkh jam hai khuban tashqand ke nam

ye sabz jam hai lahor ke hasinon ka

safed jam hai dilli ke dilbaron ke liye

ghula hai jis mein mohabbat ke aftab ka rang

khuli hui hai ufuq par shafaq tabassum ki

nasim-e-shauq chali mehrban takallum ki

labon ki shola fishani hai shabnam afshani

isi mein subh-e-tamanna naha ke nikhregi

kisi ki zulf na ab sham-e-gham mein bikhregi

jawan khauf ki wadi se ab na guzrenge

jiyale maut ke sahil pe ab na utrenge

bhari na jaegi ab khak-o-khun se mang kabhi

milegi man ko na marg-e-pisar ki khush khabari

koi na dega yatyimon ko ab mubarak bad

khulenge phul bahut sarhad-e-tamanna par

khabar na hogi ye nargis hai kis ki ankhon ki

ye gul hai kis ki jabin kis ka lab hai ye lala

ye shakh kis ke jawan bazuon ki angrai

bas itna hoga ye dharti hai shahsawaron ki

jahan-e-husn ke gumnam tajdaron ki

ye sarzamin hai mohabbat ke khwastgaron ki

jo gul pe marte the shabnam se pyar karte the

khuda kare ke ye shabnam yun hi barasti rahe

zamin hamesha lahu ke liye tarasti rahe